Ekostikerlar boʻyicha jarimalar 2028 yildan qoʻllaniladi
2026 yil bu faqat tizimni yoʻlga qoʻyish, haydovchilarni xabardor qilish va ekologik madaniyatni shakllantirish davri sanaladi.
Ijtimoiy tarmoqlarda 2026 yildan boshlab, "ekologik hudud"ga kiruvchi qizil va sariq toifadagi avtomobillar jarimaga tortilishi haqida xabarlar tarqaldi.
Rasmiy maʼlumotlarga koʻra, "Ekologik transport" tizimi doirasidagi jarimalar ikki yildan soʻng, yaʼni 2028 yildan boshlab joriy etiladi.
2026 yil — bu faqat tizimni yoʻlga qoʻyish, haydovchilarni xabardor qilish va ekologik madaniyatni shakllantirish davridir.
Bu tizim nima uchun kerak?
Avtomobillar va yuk mashinalaridan chiqayotgan zaharli gazlar iqlim oʻzgarishi, havo haroratining koʻtarilishi va kislotali yomgʻirlarga sabab boʻlmoqda.
Tizimning bosh maqsadi — jazolash emas, balki aholi orasida "Ekologik transport" tushunchasini keng targʻib qilish va shaharlarimiz havosining sifatini yaxshilashdir.
Haydovchilar uchun qanday qulayliklar bor?
Tizim haydovchilarni qiyin ahvolga solish emas, balki ularga koʻmak berish tamoyili asosida ishlaydi:
Stiker rangini oʻzgartirish huquqi: Agar avtomobilingiz dastlab sariq yoki qizil stiker olgan boʻlsa, uni texnik sozlash orqali rangini "yashil"ga oʻzgartirish imkoniyati mavjud.
Diagnostika markazlari: Respublikamizning barcha hududlarida zamonaviy diagnostika markazlari faoliyati yoʻlga qoʻyilgan. Haydovchilar oʻz mashinalarini texnik koʻrikdan oʻtkazib, stiker rangini yaxshilashlari mumkin.
Elektron ogohlantirish tizimi: Yoʻl harakati xavfsizligining yagona elektron tizimi va kameralar orqali haydovchilar qaysi hududga kirish mumkin yoki mumkin emasligi haqida oldindan xabardor qilib boriladi.
2026 yilda hech kim jarimaga tortilmaydi. Bu vaqt oraligʻida har bir haydovchi oʻz avtomobilining texnik holatini yaxshilash imkoniyatiga ega boʻladi.
Eslatib oʻtamiz, sariq va qizil ekostiker egalari ayrim hududlarga kirishda kompensatsiya toʻlaydi.
Bu amaliyot ekologik jihatdan ogʻir hududlar uchun amal qiladi.