Shavkat Mirziyoyev Yaponiyadagi vatandoshlar bilan muloqot qildi
Davlat rahbarining Yaponiyaga tashrifi oʻzbekistonlik vatandoshlar bilan uchrashuvdan boshlandi.
Prezident Shavkat Mirziyoyev Yaponiya Bosh vaziri Sanae Takaichining taklifiga binoan 18 dekabr kuni Yaponiya poytaxti Tokio shahriga yetib bordi.
“Xaneda” xalqaro aeroportida davlat rahbarini Yaponiya ichki ishlar va kommunikatsiyalar vaziri Yoshimasa Xayashi va boshqa rasmiy shaxslar kutib oldi.
Prezident Shavkat Mirziyoyev Yaponiyada mehnat qilayotgan va tahsil olayotgan vatandoshlar bilan suhbatlashdi.
Davlat rahbari vatandoshlarimizga ishi va oʻqishida muvaffaqiyatlar tilab, ular kunchiqar yurtda orttirgan bilim va tajribalar Vatanimiz taraqqiyoti hamda xalqimiz farovonligiga xizmat qilishiga ishonch bildirdi.
Eslatib oʻtamiz, tashrifning asosiy tadbirlari 19-20 dekabr kunlari boʻlib oʻtadi. Oʻzbekiston Prezidenti Yaponiya Imperatori Naruxito, Bosh vaziri Sanae Takaichi va boshqa rasmiylar, ishbilarmon doiralar hamda akademik hamjamiyat vakillari bilan uchrashuvlar oʻtkazadi.