Gollivudni larzaga solgan hodisa: mashhur aktyor oʻlimi ortidan uning oʻgʻli ushlandi
Los-Anjeles prokurorlari Nik Raynerni oʻz ota-onasi, aktyor Rob Rayner hamda Mishel Singer Raynerni oʻldirishda rasman aybladi.
Nik Rayner ota-onasini oʻldirishda ayblanmoqda.
Los-Anjeles prokurorlari seshanba kuni Nik Raynerni ota-onasi — Gollivudning taniqli arboblari va Demokratik partiyaning nufuzli vakillari Rob Rayner hamda Mishel Singer Raynerni oʻldirishda rasman aybladi.
Prokuratura maʼlumotiga koʻra, Raynerga qasddan odam oʻldirish boʻyicha ikki band qoʻyilgan. Qoʻyilgan ayblovlarni jinoyatni ogʻirlashtiruvchi holatlar sifatida koʻrib chiqilishi soʻralmoqda, chunki ishda bir nechta qotillik holati mavjud.
Agar Nik Rayner aybdor deb topilsa, unga shartli ozodliksiz umrbod qamoq yoki oʻlim jazosi berilishi mumkin. Biroq prokurorlar hozircha oʻlim jazosini talab qiladimi-yoʻqmi, bu borada aniq bayonot bermadi. (Kaliforniya gubernatori Gevin Nyusom qatl etishlarga moratoriy joriy qilgan, ammo shtatda oʻlim jazosi qonunan hanuz mavjud.) Rayner hozircha ayblovlar boʻyicha oʻz aybini tan olish yoki rad etish bildirmagan.
Los-Anjeles okrugi prokurori Natan J. Xochman ayblovlar Raynerlarning Brentvuddagi uyida ota-onasi oʻlik holda topilganidan ikki kun oʻtib eʼlon qilinganini maʼlum qildi. Prokurorlarga koʻra, Nik Rayner ota-onasini pichoq bilan oʻldirgan, sud-tibbiy ekspertiza esa ularning shanba yoki yakshanba kuni vafot etganini aniqlash ustida ish olib bormoqda.
16 dekabr kuni tushdan keyin jurnalistlar bilan toʻla zalda chiqish qilgan Xochman, ish jabrlanuvchilar va ayblanuvchi oʻrtasidagi yaqin qarindoshlik tufayli nihoyatda murakkab boʻlishini taʼkidladi.
“Oila aʼzolar ishtirokidagi bunday ishlar idoramiz duch keladigan eng ogʻir va yurakni larzaga soladigan holatlardandir” — dedi u.
Shuningdek, u ishning mashhurligi sababli mish-mishlar va taxminlar koʻpayishi mumkinligini aytib, jamoatchilikni ehtiyotkor boʻlishga chaqirdi.
Los-Anjeles politsiya boshligʻi Jim Makdonnelning aytishicha, 14 dekabr kuni tushdan keyin Raynerlar uyiga chaqiruv boʻyicha politsiya borgan va Nik Rayner oʻsha kechasi Janubiy Kaliforniya universiteti yaqinida qarshiliksiz hibsga olingan.
Nik Rayner 16 dekabr tongida ilk bor sudga chiqishi kutilgan edi, biroq uning advokati Alan Jekson mijozining sogʻligʻi sabab qamoqxonadan sudga olib kelishga tibbiy ruxsat berilmaganini bildirib, u sud majlisida qatnashmasligini aytdi.
Bu fojea Gollivudni larzaga soldi va undan ancha uzoqlarga ham aks-sado berdi. Maʼlum qilinishicha, Nik Rayner yillar davomida narkotik qaramlik (addiksiya) muammolari bilan kurashib kelgan, ota-onasi esa uni qutqarish uchun qoʻlidan kelganini qilgan.