Afgʻonistondan kontrabanda qilinib, Buxoroga olib kelingan salkam 5 kg "opiy" qoʻlga olindi
Bunday jinoyatni sodir etgan shaxslar 10 yildan 20 yilgacha ozodlikdan mahrum qilinishlari mumkin.
Afgʻonistondan olib kelingan giyohvandlik vositasi toʻxtatib qolindi.
“Xavfsiz va sogʻlom yurt” tezkor-profilaktik tadbirlari doirasida Davlat xavfsizlik xizmati Buxoro viloyati boʻyicha boshqarmasi xodimlari tomonidan katta miqdordagi narkotik moddalarning noqonuniy aylanmasiga chek qoʻyildi.
Xususan, “Buxoro – Qorakoʻl” yoʻnalishida harakatlanayotgan “Jentra” rusumli avtotransport vositasi Jondor tumani hududida toʻxtatilib, tekshirildi.
Natijada, Qorakoʻl tumanida yashovchi, 1969 y.t. shaxs va 1973 y.t. xorijiy davlat fuqarosi ketayotgan avtomashina salonida sof vazni 4 kg 715 g boʻlgan “opiy” moddasi borligi aniqlanib, protsessual tartibda rasmiylashtirib olindi.
Maʼlum boʻlishicha, ular ushbu ajal ogʻusini muqaddam narkokurʼerlar tomonidan Afgʻonistondan kontrabanda qilinib, Buxoro shahri hududiga yashirib ketilgan xufiya joydan olishgan.
Hozirda mazkur fuqarolarga nisbatan Jinoyat Kodeksining 28,246-moddasi 2-qismi (kontrabanda) va 25,273-moddasi 5-qismi (giyohvandlik vositalari, ularning analoglari yoki psixotrop moddalarni oʻtkazish...) bilan jinoyat ishi qoʻzgʻatilib, “qamoq” ehtiyot chorasi qoʻllanildi.
Qonunchilikka muvofiq, bunday jinoyatlar sodir etgan shaxslar 10 yildan 20 yilgacha ozodlikdan mahrum qilinishlari mumkin.
Avvalroq DXX marmar toshlar orasiga yashirilgan 37,5 kg giyohvand modda aniqlagandi.
Chet ellik shaxs qurilishda foydalaniladigan toshlar orasiga giyohvandlik vositalarini yashirib mamlakatga olib kelgan, mahalliy fuqarolar esa ularni sotish bilan shugʻullangan.