Tramp BBC'ga qarshi sudga daʼvo arizasi kiritdi

Tramp BBCʼni 6 yanvardagi nutqi tahriri sabab sudga berdi, prezident 10 milliard dollargacha tovon talab qilmoqda.

AQSh prezidenti Donald Tramp BBCʼni Panorama dasturida 6 yanvar voqealariga oid nutqini chalgʻituvchi tarzda tahrirlaganlikda ayblab, telekompaniyaga qarshi sud daʼvosi kiritdi.

U BBCʼni tuhmat va saylov jarayoniga aralashishda ayblab, jami 10 milliard dollargacha tovon puli talab qilmoqda.

Dushanba oqshomida kiritilgan daʼvoda Tramp ikki band boʻyicha har biri uchun 5 milliard dollardan, jami 10 milliard dollar tovon puli talab qildi. U BBCʼni tuhmat qilganlikda va Florida shtatining "Adolatsiz va chalgʻituvchi savdo amaliyotlari toʻgʻrisida"gi qonunini buzganlikda aybladi.

BBCʼning Panorama dasturida berilgan montaj Tramp nutqining deyarli bir soat farq bilan aytilgan qismlaridan olingan boʻlib, unda Tramp goʻyoki olomonga shunday degandek koʻrsatilgan:

“Biz Kapitoliyga yuramiz va men siz bilan birga boʻlaman, va biz kurashamiz. Biz jon-jahdimiz bilan kurashamiz.”

BBC sud daʼvosi boʻyicha darhol izoh bermadi. Avvalroq korporatsiya montaj xato qilinganini tan olib, Trampdan uzr soʻragan, biroq tuhmat boʻyicha daʼvo uchun huquqiy asos yoʻqligini taʼkidlagan edi.

Oʻtgan oy BBC bosh direktori Tim Deyvi va BBC News rahbari Debora Terness ushbu mojarodan soʻng isteʼfoga chiqdi. Ularning ketishi Tramp, Gʻazo va trans masalalarini yoritishda jiddiy va tizimli muammolar borligi haqidagi ayblovlar ortidan yuzaga kelgan inqiroz choʻqqisida eʼlon qilindi.

Tramp oʻziga yoqmagan materiallarni chiqargan OAVlarga bosim oʻtkazish uchun sud daʼvolaridan uzoq vaqtdan beri foydalanib keladi. BBCʼga qarshi daʼvo bu kampaniyani global miqyosga olib chiqdi.

Daʼvo Florida janubiy okrugi boʻyicha AQSh federal sudiga topshirildi — holbuki, Panoramani namoyish etuvchi BBC iPlayer va BBC One AQShda mavjud emas, va epizod AQShda efirga uzatilmagan.

Shunga qaramay, Trampning yuristlaridan biri nutq montaji 2024 yilgi prezidentlik saylovidan bir hafta oldin efirga berilganini eslatib, bu holatni saylov jarayoniga ochiqdan-ochiq aralashuv deb atadi.

“BBC prezident Trampni yoritishda oʻzining chap qanot siyosatchilariga xizmat qilib, anchadan beri tomoshabinlarni aldab kelmoqda” dedi yurist. “Xuddi boshqa soxta yangiliklar tarqatgan yirik OAVlarni javobgarlikka tortgani kabi, Prezident Tramp BBCʼni ham tuhmat va saylovga masʼuliyatsiz aralashgani uchun javobgarlikka tortmoqchi”, deya qoʻshimcha qildi u.

Daʼvoda Florida sudi ishni koʻrishga vakolatli ekani, chunki BBC shtatda keng koʻlamli va doimiy biznes faoliyati bilan shugʻullanishi taʼkidlandi. Bunga BBC sayti va AQShni ham oʻz ichiga olgan bozorlarida faoliyat yurituvchi BritBox striming platformasi misol keltirildi.

Tramp dushanba kuni Oq uyda jurnalistlarga: “Yaqinda koʻrasiz, men BBCʼni sudga berayapman — ular soʻzlarimni oʻzgartirishdi. Soʻzma-soʻz, men aytmagan gaplarni aytgandek koʻrsatishdi,” — dedi.

Oʻtgan noyabrda qayta saylanganidan beri Tramp AQShdagi yirik media kompaniyalarga qarshi bir qator shov-shuvli sud gʻalabalarini qoʻlga kiritdi. Masalan, Disneyʼga qarashli ABC telekanali boshlovchi Jorj Stefanopulosning izohlari sabab Tramp kiritgan tuhmat daʼvosi boʻyicha kelishuv doirasida 15 million dollar toʻlashga rozi boʻlgan.