Gollivud afsonasi Rob Rayner va rafiqasi uyidan oʻlik holda topildi
Huquq-tartibot idoralariga yaqin manbalarga koʻra, marhumlarning tanasida pichoq bilan yetkazilgan jarohatlar boʻlishi mumkin va voqea yuzasidan qotillik ehtimoli bilan tergov boshlangan.
Gollivud afsonasi Rob Rayner va rafiqasi Los-Anjelesdagi uyida oʻlik holda topildi.
Mashhur amerikalik rejissyor va aktyor Rob Rayner hamda uning rafiqasi Mishel Rayner yakshanba kuni Los-Anjelesdagi uylarida oʻlik holda topildi. Huquq-tartibot idoralariga yaqin manbalarga koʻra, marhumlarning tanasida pichoq bilan yetkazilgan jarohatlar boʻlishi mumkin va voqea yuzasidan qotillik ehtimoli bilan tergov olib borilmoqda.
Tergovdan xabardor huquq-tartibot idorasi vakilining maʼlum qilishicha, rejissyor va aktyor Rob Rayner hamda uning rafiqasi Mishel yakshanba kuni Reynerga tegishli Los-Anjelesdagi uyda oʻlik holda topilgan.
Rasmiylardan biri tergov tafsilotlarini ommaga oshkor eta olmasligini aytib, anonimlik sharti bilan izoh bergan.
Uning soʻzlariga koʻra, tergovchilar ularning tanasida pichoq bilan yetkazilgan jarohatlar boʻlganiga ishonmoqda va oila aʼzolaridan biri soʻroq qilinmoqda.
Los-Anjeles yongʻin xizmati maʼlumotiga koʻra, ular soat 15:30 dan keyin tibbiy yordam chaqiruvi asosida voqea joyiga yetib borgan va uy ichida 78 yoshli erkak hamda 68 yoshli ayolning vafot etganini aniqlagan. Rob Rayner mart oyida 78 yoshga toʻlgan edi.
Rob Rayner uzoq yillar Gollivudning eng sermahsul rejissyorlaridan biri boʻlib kelgan. U 1980–1990 yillarning eng mashhur filmlaridan sanalgan “Bir necha qahramon ”, “Harri Sallini uchratganda” va “Qirolicha kelin” kabi kartinalarni yaratgan.
Uning 1970-yillarda suratga olingan “Oiladagi hamma” serialidagi Mithed roli Raynerni mashhurlikka olib chiqdi va unga ikki marotaba “Emmi” mukofotini keltirdi.
Joriy yil boshida Set Rogen bilan boʻlgan intervyusida Rob Rayner oʻz faoliyatidagi barcha yutuqlar aslida bitta asosiy qoidaga borib taqalishini aytgandi.
“Men butun faoliyatim davomida faqat bitta savolni berib kelganman: "Bu ish mening kimligimning, ichki dunyoyimni koʻrsata oladimi? "Men bilan boʻl" filmi muvaffaqiyatli boʻladimi yoki yoʻqmi — buni bilmasdim. Lekin men shuni bilardimki, bu film menga yoqadi, chunki undagi tuygʻular menga juda tanish”, degan edi mashhur rejissyor.
2023 yilda vafot etgan afsonaviy prodyuser Norman Lirning qarindoshlari ham bu xabardan chuqur qaygʻuga tushganini bildirdi.
“Norman Robni koʻpincha oʻgʻlim deb atardi va ularning yaqin munosabatlari biz va butun dunyo uchun oʻzgacha edi”, deyiladi Lir oilasi bayonotida.
Los-Anjeles meri Karen Bass Raynerning oʻlimini shahar uchun katta yoʻqotish deb atadi.
“Rob Raynerning Amerika madaniyati va jamiyati uchun hissasi cheksiz. U ijodiy faoliyati va ijtimoiy hamda iqtisodiy adolat yoʻlidagi kurashi orqali koʻplab insonlarning hayotini yaxshiladi”, deyiladi merning bayonotida. “Mashhur aktyor, rejissyor, prodyuser, yozuvchi va faol siyosiy faollik egasi sifatida u doimo oʻz isteʼdodini boshqalarga yordam berishga yoʻnaltirdi”.
Mashhur komediya ustasi Karl Raynerning oʻgʻli boʻlgan Rob Rayner 1989 yildan beri fotograf Mishel Singer Rayner bilan turmush qurgan edi. Ular “Harri Sallini uchratganda” filmi ustida ishlash jarayonida tanishib, uch farzandni voyaga yetkazgan.
Brentvud mahallasida qotilliklar kam uchraydi. Voqea joyi 1994 yilda O.J. Simpsonning rafiqasi Nikol Braun Simpson va uning doʻsti Ron Goldman oʻldirilgan uyga taxminan bir yarim kilometr masofada joylashgan.