Prezident goʻsht va sut mahsulotlarini koʻpaytirishni topshirdi
Hozirgi kunda Oʻzbekistonda goʻsht narxi oshishdan toʻxtamayapti, shuning uchun mazkur masala dolzarbligicha qolmoqda.
Prezident Shavkat Mirziyoyev qishloq xoʻjaligi xodimlari bilan uchrashuvda yana bir zarur masala – goʻsht va sut mahsulotlarini koʻpaytirishni topshirdi.
Kelgusi yilda chetdan 100 ming bosh qoramol va 200 ming bosh qoʻy-echki olib kelinadi. Paxta va gʻalla yoʻnalishidagi fermerlarga oʻz yerida chorvachilikni yoʻlga qoʻyish uchun 20 sotixgacha joyda yengil konstruksiyali bino qurishga ruxsat beriladi. Import qilingan nasldor qoramol va bir kunlik joʻja uchun subsidiya ajratish tartibi yana 5 yilga uzaytiriladi.
"Bunga qoʻshimcha JICA’dan 150 million dollar, Osiyo taraqqiyot bankidan 60 million dollar jalb qilinadi. Bu mablagʻlarni samarali ishlatib, kelgusi yilda 5 trillion soʻmlik 1 mingta loyihani ishga tushirish, Fransiya tajribasi asosida 167 ta tumanda 340 ta goʻsht va sut yoʻnalishidagi 50-60 boshli kichik chorvachilik xoʻjaliklarini tashkil etish muhim", dedi davlat rahbari.
Chorvachilik loyihalari uchun keyingi yil Jahon banki va Qishloq xoʻjaligini rivojlantirish xalqaro jamgʻarmasidan olib kelingan resurslar hisobidan 157 million dollar yoʻnaltiriladi. Ushbu mablagʻlar chorvadorlarga 10 yil muddatga 3 yillik imtiyozli davr bilan 17 foizdan beriladi.