Oʻzbekiston Qahramoni Abduraim Homidov vafot etdi
U fermerlik harakatining vakili, tashabbuskori sifatida paxtadan yuqori hosil olish boʻyicha oʻziga xos namuna maktabini yaratgandi.
Oʻzbekiston Qahramoni Abduraim Homidov 82 yoshida vafot etdi. Bu haqda Namangan viloyati hokimligi xabar berdi.
Abduraim Xomidov 1943 yilda Namangan viloyati, Toʻraqoʻrgʻon tumanida tugʻilgan.
Mehnat faoliyatini 1960 yildanoq tumandagi «Oʻzbekiston» jamoa xoʻjaligida mexanizatorlikdan boshlagan. Soʻngra shirkat xoʻjaligi pudratchisi, 2007 yildan uzoq yillar mobaynida «Shahand humo qushi» fermer xoʻjaligi rahbari sifatida samarali mehnat qildi. 2017 yildan beri esa mehnat faxriysi edi.
A.Homidov fermerlik harakatining fidoiy vakili, tashabbuskori sifatida paxtadan yuqori hosil olish boʻyicha oʻziga xos namuna maktabini yaratdi. 1993 yilda Oʻzbekiston Respublikasining Faxriy yorligʻi, 2001 yilda «Mehnat shuhrati» ordeni, 2004 yilda esa Davlatimizning oliy nishoni - «Oʻzbekiston Qahramoni» unvoni bilan taqdirlangan edi.
Xalq deputatlari Namangan viloyati Kengashi deputati sifatida ham faoliyat yuritgan.