Buxoroda portlovli moddalar sexi portlab ketdi
Hodisa oqibatida 4 kishi halok boʻlgan, omborda jami 30 kishi bor edi.
Bugun, 6 dekabr kuni soat 09:40 da Buxoro viloyati Kogon tumani Mustaqillik mahallasida joylashgan togʻ-kon sanoati korxonalari uchun portlovchi moddalarni ishlab chiqarish sexida portlash yuz bergan.
Oqibatda kelib chiqqan yongʻin viloyat favqulodda vaziyatlar boshqarmasining 7 ta qutqaruv boʻlinmasi tomonidan soat 10:27da toʻliq oʻchirilgan.
Portlash vaqtida omborda 30 nafar ishchi boʻlgan, ulardan 4 nafari vafot etgan. Yengil darajada tan jarohati olgan 4 nafar xodim shifoxonaga joylashtirilgan, ularning 2 nafariga ambulator tibbiy yordam koʻrsatilib, uyiga ruxsat berilgan.
Prezident topshirigʻiga muvofiq Sanoat xavfsizligi qoʻmitasi raisi A.Rafiqov boshchiligida masʼul vazirlik va idoralar vakillaridan iborat hukumat komissiyasi tuzilgan.
Hukumat komissiyasiga jabrlanganlarga zarur yordam koʻrsatish, portlash oqibatlarini bartaraf qilish, ushbu baxtsiz hodisaning kelib chiqish sabablarini aniqlash hamda kelgusida bu kabi noxush holatlarning oldini olish choralarini koʻrish vazifasi yuklatilgan.
Maʼlumot uchun, sex 2019 yildan buyon faoliyat yuritib kelayotgan Markaziy Osiyo va Oʻzbekiston togʻ-kon sanoati korxonalari ehtiyojlari uchun yangi konlarni oʻzlashtirishda qoʻllaniladigan portlovchi moddalarni yetkazib berishga ixtisoslashgan korxona hisoblanadi.