Kubada chivin orqali yuqadigan viruslar sabab 33 kishi qurbon boʻldi
Vafot etganlarning salmoqli qismi bolalardir. Bir haftada 5,7 ming kishi chikungunya isitmasi bilan kasallangan.
Kuba Sogʻliqni saqlash vazirligi chivin chaqishi orqali tarqaladigan viruslar tufayli 33 kishining oʻlimi haqida xabar berdi.
"Granma" gazetasining xabar berishicha, mamlakatda denge va chikungunya isitmasi eng koʻp tarqalgan holda, epidemiologik vaziyat ogʻirligicha qolmoqda. Sogʻliqni saqlash vaziri oʻrinbosari Karilda Pena Garsiyaning soʻzlariga koʻra, denge bilan kasallangan 12 kishi vafot etgan (ulardan yettitasi 18 yoshgacha boʻlgan) va chikungunyadan 21 kishi vafot etgan (ulardan 14 nafari bolalar).
Mamlakat boʻylab kasallanish holatlari umumiy kamayganiga qaramay, baʼzi hududlarda epidemiologik vaziyat yomonlashmoqda.
Pena Garsiyaning soʻzlariga koʻra, soʻnggi hafta ichida Kubada chikungunya isitmasi bilan kasallangan 5717 ta yangi holat qayd etilgan. Kasalliklarning umumiy soni 38 938 taga yetdi, ulardan 1260 tasi PSR testlari bilan tasdiqlangan.
Yuqori isitma, yalligʻlanish va boʻgʻim ogʻrigʻi bilan kechadigan va asoratlarga olib kelishi mumkin boʻlgan bu kasallik uchun maxsus davolash yoʻq. Denge bezgagi mamlakatning barcha viloyatlarida aylanib yuribdi.
Noyabr oyi oʻrtalarida Kuba prezidenti Migel Dias-Kanel Kuba sogʻliqni saqlash idoralari COVID-19 pandemiyasi davrida qoʻllanilgan yondashuvlarni qoʻllagan holda epidemiologik vaziyatni barqarorlashtirish ustida ishlashda davom etayotganini aytdi. Uning taʼkidlashicha, kubalik olimlar va turli sohalardagi mutaxassislar shoshilinch qarorlar tayyorlash uchun joriy maʼlumotlarni tahlil qilmoqdalar.