Jizzax shahri va Sharof Rashidov tumani yagona aglomeratsiya asosida rivojlantiriladi

Jizzaxdagi yigʻilishda qurilish va infratuzilma masalalari muhokama qilinar ekan, ijtimoiy xizmatlar, mehnat bozori va infratuzilmani markazdan uzoq mahallalar aholisiga yaqinlashtirish zarurligi qayd etildi.

Urbanizatsiya agentligi va viloyat hokimligiga Yevropadan mutaxassislarni jalb qilib, Jizzax shahri va Sharof Rashidov tumanini yagona aglomeratsiya asosida rivojlantirish boʻyicha master-reja ishlab chiqish topshirildi. Bunda Sharof Rashidov tumani va Jizzax shahri oʻrtasidagi 40 gektar boʻsh maydon tanlab olinadi va keyingi yildan ushbu massivda 1 ming 200 xonadonli 50 ta koʻp qavatli uy quriladi.

Master-rejada yangi massivda barpo etiladigan bogʻcha, maktab, shifoxona kabi ijtimoiy obʼektlar, elektr, suv, yoʻl infratuzilmalari Jizzax shahri va Sharof Rashidov tumani aholisi uchun birdek xizmat qilishi, ikkita hududni bir-biri bilan bogʻlaydigan yagona jamoat transporti tizimini yoʻlga qoʻyish koʻzda tutilishi kerak.

Massiv hududida yagona maʼmuriy markaz qurib, Sharof Rashidov tumanidagi barcha 21 ta davlat tashkilotini shu yerga koʻchirish zarurligi qayd etildi.

temir yoʻl kesishmalarida yuzaga keladigan tirbandliklar koʻp yillardan buyon odamlarni qiynab kelayotgan edi.

Aholining talab va istaklarini inobatga olib, shahar ichidagi tirbandlikni bartaraf etish uchun 10 kilometrli aylanma yoʻl quriladi.

Shuningdek, Dashtobod shaharchasi va Xovos tumani oʻrtasidagi temir yoʻl ustidan ham yangi koʻprik qurilishi boshlandi.

Shu kunga qadar 200 mingdan ortiq aholisi bor Jizzax shahrida shahar shifoxonasi boʻlmagan. Bugun Jizzax shahri Oqqoʻrgʻon mahallasida viloyat koʻp tarmoqli tibbiyot markazi uchun qurilgan yangi bino bilan tanishildi. Endi viloyat shifoxonasining eski binosi oʻrnida shahar markaziy shifoxonasi va poliklinikasi tashkil etiladi.

Mazkur obʼektni keyingi yil investitsiya dasturiga kiritib, taʼmirlash va jihozlash uchun 20 milliard soʻm ajratish topshirildi.