Oʻzbekistonda pomidor, bodring va propan narxi keskin qimmatladi

Noyabr oyida isteʼmol sektoridagi tovarlar va xizmatlar narxlari oʻrtacha 0,7 % ga oshdi. Bu haqda Milliy statistika qoʻmitasi maʼlumot berdi.

2025 yilning noyabr oyida isteʼmol sektoridagi tovarlar va xizmatlar narxlari oʻrtacha 0,7 % ga oshgan.

Yillik isteʼmol narxlari indeksi (INI) 107,5 % ni tashkil etib, oʻtgan yilning shu oyiga (2024 yil noyabr — 110,0 %) nisbatan 2,5 foiz bandga pasaydi.

Noyabr oyida oziq-ovqat mahsulotlari narxlari oʻrtacha 1,0 % ga, nooziq-ovqat tovarlari 0,5 % ga hamda aholiga koʻrsatiladigan pullik xizmatlar esa 0,3 % ga qimmatlashgani kuzatilgan.

Asosiy oziq-ovqat mahsulotlaridan bodring (96,0 %), pomidor (82,2 %), bulgʻor qalampiri (61,2 %), baqlajon (51,7 %), uzum (12,1 %), anor (7,9 %), qovoq (5,4 %), olma (4,7 %), mandarin (4,5 %), shaftoli (3,7 %), tarvuz (3,4 %), qovun (3,4 %), tovuq tuxumi (2,4 %), quy goʻshti (0,8 %), kartoshka (0,7 %), birinchi navli bugʻdoy uni (0,5 %) hamda mol goʻshti (suyaksiz goʻshtidan tashqari) (0,3 %) narxlarining oshishi inflyatsiyaga asosiy taʼsir koʻrsatdi.

Asosiy oziq-ovqat mahsulotlaridan inflyatsiyani pasaytiruvchi omil sifatida sabzi (-26,1 %), sholgʻom (-7,1 %), barcha navdagi guruch, guruch oqishogʻi (-4,5 %), loviya (4,2 %), shakar (-2,9 %), piyoz (-2,5 %), banan (-1,3 %) hamda parranda goʻshti (-1,2 %) narxlarining pasayishi muhim hissa qoʻshdi.

Shuningdek, nooziq-ovqat mahsulotlar narxlaridan propan (7,4 %), benzin (1,7 %), sement (1,4 %) hamda kiyim va poyafzal (0,7 %) narxlarida oʻsish kuzatildi.

Hisob-kitoblar uchun 10 mingdan ortiq savdo va xizmat koʻrsatish nuqtalarida 195 mingga yaqin narxlar qayd etilgan. 420 turdagi oziq-ovqat va nooziq-ovqat mahsulotlari va 90 turdagi xizmatlar narxlari kuzatildi.