Dekabr oyidan Oʻzbekistonda nimalar oʻzgaradi?

1 dekabrdan Oʻzbekistonda nimalar oʻzgaradi? Quyida batafsil maʼlumotni taqdim etamiz.

Seysmologik onlayn platforma ishga tushiriladi

Prezidentning oktabrdagi farmoni bilan seysmik xavfsizlikni taʼminlash va seysmologiya sohasidagi ishlar samaradorligini yanada oshirish boʻyicha qoʻshimcha chora-tadbirlar belgilandi.

Unga muvofiq,2025 yil 1 dekabrdan yildan boshlab yagona tizim asosida seysmologik onlayn platforma raqamlashtirish bilan ishga tushiriladi:

-mintaqaviy akselerogrammalar ehtimoliy zilzilalar bazasi;

-ilmiy tahlil asosida respublika hududlarini seysmik xavf darajasi boʻyicha tasniflashni nazarda tutuvchi umumiy seysmik va batafsil rayonlashtirish xaritalari;

-mikrorayonlashtirish xaritalari tuman va shahar markazlari makroseysmik ballar va eng yuqori tezlanishlarda;

-respublikadagi mavjud xaritalar faol tektonik uzilmalar.

Zilzilalar kuchini koʻrsatib beruvchi mintaqaviy akselerogrammalar bazalaridan kelib chiqib loyihalashtirish amaliyoti yoʻlga qoʻyiladi

2025 yil 1 dekabrdan zilzilalar kuchini koʻrsatib beruvchi mintaqaviy akselerogrammalar bazalaridan kelib chiqib loyihalashtirish amaliyoti yoʻlga qoʻyiladi.

Bu Vazirlar Mahkamasining 17 noyabrdagi «Bino va inshootlarning zilzilabardoshligini oshirishga oid qoʻshimcha chora-tadbirlar toʻgʻrisida»gi qarorida koʻzda tutilgan.

Prezidentning apreldagi qaroriga muvofiq, xavflilik omili III-IV toifa boʻlgan obʼektlarni hududning zilzilalar kuchini koʻrsatib beruvchi mintaqaviy akselerogrammalar bazalaridan kelib chiqib loyihalashtirish va qurish tartibi joriy etilishi belgilangan.

Isteʼmolchilarning murojaatlarini koʻrib chiqishda yangi tizim joriy etiladi

Isteʼmolchilarning murojaatlarini koʻrib chiqish samaradorligini oshirish maqsadida 2025 yil 1 dekabrdan boshlab «isteʼmolchi — tadbirkor — nodavlat notijorat tashkilotlar — davlat organlari» tizimi joriy etiladi.

Bunda:

isteʼmolchilarning barcha murojaatlari Raqobat qoʻmitasida ishga tushiriladigan «Isteʼmolchi murojaati» axborot tizimi orqali qabul qilinadi va barcha bosqichlarda monitoring qilib borish tizimi yoʻlga qoʻyiladi;

«Isteʼmolchi murojaati» axborot tizimini Soliq qoʻmitasining yagona axborot tizimiga integratsiya qilish orqali barcha tadbirkorlik subʼektlariga isteʼmolchilardan murojaatlar kelib tushgani haqida xabar yuborish tizimi yoʻlga qoʻyiladi;

isteʼmolchining «Isteʼmolchi murojaati» axborot tizimi orqali roʻyxatga olingan murojaati, birinchi navbatda, tadbirkor tomonidan Raqobat qoʻmitasi nazorati ostida 10 kun ichida koʻrib chiqiladi, isteʼmolchi murojaati ijobiy hal etilmagan taqdirda, murojaatchining tanloviga koʻra Qoʻmitaga yoki nodavlat notijorat tashkilotlarga oʻrganib chiqish uchun yuboriladi.

Tadbirkorlarga qoʻshimcha ravishda kafolatlar taqdim etiladi

Prezidentning 26 sentabrdagi «Tadbirkorlik subʼektlarini yangicha yondashuvlar asosida qoʻllab-quvvatlash chora-tadbirlari toʻgʻrisida»gi farmoniga muvofiq, 2025 yil 1 dekabrdan Tadbirkorlikni rivojlantirish kompaniyasi tomonidan qoʻshimcha ravishda kafolat yoki kafillik quyidagi shartlarda taqdim etiladi:

-yirik tadbirkorlik subʼektlariga 10 milliard soʻmgacha, biroq kredit, lizing, bank kafolati va akkreditivlarning 50 foizidan ortiq boʻlmagan miqdorda;

kompaniyaning kuzatuv kengashi qarori bilan belgilangan tartibda oʻrta va yirik tadbirkorlik subʼektlarining ishlab chiqarish, xizmat koʻrsatish va «yashil» iqtisodiyot yoʻnalishidagi yirik loyihalariga ularning aylanmasidan kelib chiqib, 10 milliard soʻmdan ortiq boʻlgan miqdorda;

-avval kafillikdan ijobiy foydalangan va yaxshi kredit tarixiga ega boʻlgan tadbirkorlik subʼektlariga amalda belgilangan kafillik miqdorini 1,5 baravargacha oshirgan holda;

-garov taʼminoti boʻyicha yuzaga kelgan taqchillikni bartaraf etish uchun barcha toifadagi tadbirkorlik subʼektlariga belgilangan miqdorlar doirasida ajratilgan kredit, lizing, bank kafolati va akkreditivlarga.

NNTlar elektron idoralararo hamkorlikni amalga oshiradi

Prezidentning davlat boshqaruvi va iqtisodiyotning real sektorini raqamli transformatsiya qilish chora-tadbirlari toʻgʻrisidagi qaroriga muvofiq, 2025 yil 1 dekabrdan boshlab nodavlat notijorat tashkilotlariga «Raqamli hukumat» tizimining Idoralararo integratsiyalashuv platformasi orqali belgilangan tartibda elektron idoralararo hamkorlikni amalga oshirishga ruxsat beriladi.

Notarial tasdiqlangan nikoh shartnomalari aslini notariusga taqdim etish talab qilinmaydi

«Notariat institutini yanada rivojlantirish va sohaga zamonaviy axborot-kommunikatsiya texnologiyalarini keng joriy etish boʻyicha qoʻshimcha chora-tadbirlar toʻgʻrisida»gi prezident qarori bilan notarial xizmatlar koʻrsatishda bir qator talablar bekor qilindi.

Xususan, 2025 yil 1 dekabrdan respublikada notarial tasdiqlangan nikoh shartnomalari nusxasini «Notarius» axborot tizimiga majburiy yuklash tartibi joriy etiladi hamda ularning aslini notariusga taqdim etish talab qilinmaydi. Bunda notarial harakatlarni amalga oshirish jarayoni qayd etilgan audio va videoyozuvlar elektron qurilmalarda saqlanadi hamda ularni Tizimda toʻgʻridan-toʻgʻri notarial harakatga biriktirish va saqlash imkoniyati yaratiladi.

Nikohni rasmiylashtirishda tibbiy maʼlumotnoma koʻrsatish talabi bekor qilinmoqda

Prezidentning byurokratik tartiblarni qisqartirishni nazarda tutuvchi farmoniga muvofiq, 1 dekabrdan idoralararo axborot almashinuvini yoʻlga qoʻyish orqali nikoh tuzilgani va nikohdan ajratilganlik toʻgʻrisidagi dalolatnoma yozuvlarini shakllantirishda quyidagi hujjatlarni taqdim etish talabi bekor qilinadi:

-nikohni rasmiylashtirishda FHDYo organlari tomonidan nikohlanuvchi shaxslarning salomatligi toʻgʻrisida tibbiy maʼlumotnoma taqdim qilish;

-nikohdan sud qarori asosida ajratilganda, tegishli dalolatnoma yozuvini shakllantirish uchun FHDYo organlariga sud qarorini taqdim etish.

Ekologiya boʻyicha maʼlumotlar ochiq boʻladi

Oʻzbekiston prezidentining 15 maydagi qarori bilan 2030 yilgacha boʻlgan davrda aholining ekologik madaniyatini oshirish konsepsiyasi tasdiqlangan edi.

Orxus konvensiyasiga qoʻshilish doirasida 1 dekabrdan Ekologiya vazirligi davlat atrof-muhit monitoringi maʼlumotlar bazasining jamoatchilik uchun ochiq boʻlishini taʼminlaydi.

Xususan, «Yashil makon» loyihasi doirasida har yili ekiladigan daraxt va koʻchatlar, jumladan, ekish manzillari, ularni parvarish qilish uchun masʼul shaxslar, koʻchat turlari va boshqa maʼlumotlar joylashtiriladi.

Xalqaro turizm akademiyasi Samarqand kampusi faoliyat boshlaydi

Prezidentning Xalqaro turizm akademiyasi Samarqand kampusi faoliyati tashkil etishga oid qaroriga muvofiq, 2025 yil 1 dekabrdan:

-turizm sohasi subʼektlari mutaxassislari shartnoma asosida qayta tayyorlanadi va malakasi oshiriladi.

Har yili Butunjahon turizm tashkilotiga aʼzo davlatlarning 100 nafar iqtidorli mutaxassislariga Akademiyaning qayta tayyorlash va malaka oshirish oʻquv dasturlarida taʼlim olish uchun maxsus grant ajratiladi.

Nodavlat sud ekspertlari yakka tartibda faoliyat yurita boshlaydi

Sud-ekspertlik faoliyati raqamlashtirishga oid prezident qaroriga muvofiq, 2025 yil 1 dekabrdan nodavlat sud ekspertlariga yakka tartibda sud-ekspertlik byurosi shaklida faoliyat yuritish huquqi beriladi.

Normativ-huquqiy hujjatlarni tahlil qilish platformasi ishga tushiriladi

2025 yil 1 dekabrdan fuqarolar, advokatlar, yuristlar, sudyalar uchun normativ-huquqiy hujjatlarni tahlil qilish platformasi ishga tushiriladi. Bu sudlar faoliyatida sunʼiy intellekt texnologiyalarini joriy etishga oid prezident farmonida koʻzda tutilgan.

Shuningdek, 2025 yil yakunigacha sud hujjatlarini avtomatik tayyorlash maxsus axborot dasturi yaratiladi.