“Biz ochiq va zamonaviy axborot muhitini yaratmoqdamiz”
Ommaviy axborot vositalari uchun kontent tayyorlash markazi direktori Qobuljon Ahmedov Bokudagi Turkiy davlatlar tashkiloti yigʻilishida ushbu masalaga toʻxtaldi.
Oʻzbekiston Prezidenti administratsiyasi huzuridagi Ommaviy axborot vositalari uchun kontent tayyorlash markazi direktori Qobuljon Ahmedov Bokuda boʻlib oʻtgan Turkiy davlatlar tashkiloti (TDT) ommaviy axborot vositalari, axborot uchun masʼul vazirlari va rasmiylari 7-yigʻilishi doirasida “Trend” agentligiga intervyu berdi.
Ahmedov oʻz soʻzida dastlab Oʻzbekistonda keng koʻlamli islohotlar amalga oshirilayotgani, jumladan media makonini rivojlantirish, yosh mutaxassislar tayyorlashga alohida eʼtibor qaratilayotganini taʼkidladi.
– Biz mamlakatdagi ijobiy oʻzgarishlar surʼatini aks ettiruvchi ochiq va zamonaviy axborot muhitini yaratmoqdamiz, – dedi u. – Ayni jarayonda yosh hamkasblarimizni qoʻllab-quvvatlash asosiy yoʻnalish sifatida belgilangan. Shuningdek, yoshlar media salohiyatini rivojlantirishga qaratilgan koʻplab dasturlar – mobil jurnalistika va ijtimoiy media boʻyicha oʻquv kurslari, blogerlar va ijodkorlar uchun amaliy mashgʻulotlar yoʻlga qoʻyilgan.
Oʻzbekistonlik ekspert turkiy dunyo mamlakatlarini birlashtirib turadigan boy madaniy meros va umumiy intilish mavjud hamkorlikni kengaytirish uchun ulkan salohiyat yaratishini taʼkidladi.
– Oʻzbekiston TDT faoliyatida nazarda tutilgan barcha tashabbuslar, jumladan isteʼdodlar almashinuvi, birgalikda kontent ishlab chiqarishga tayyor, – dedi Markaz direktori.