Zelenskiy ofisi rahbari ishdan olindi: u frontga ketmoqchi

Ukraina prezidentining maʼmuriyati rahbari Andriy Yermak lavozimidan ozod etildi.

Yermak Ukraina prezidenti Vladimir Zelenskiydan keyin ikkinchi eng qudratli shaxs sifatida koʻrilardi.

Ukraina prezidentining maʼmuriyati rahbari Andriy Yermak yillar davomida mamlakatdagi ikkinchi eng qudratli shaxs sifatida keng tanilgan edi.

Uning ishdan ketishi Prezident Vladimir Zelenskiyni ayniqsa nozik pallada yaqin siyosiy ittifoqchisiz qoldirdi. Rossiya bosqini boshlanganiga qariyb toʻrt yil boʻlgan bir pallada Ukraina AQSh bilan muzokaralar olib bormoqda va Zelenskiy hukumati muxolifat bosimiga tobora koʻproq duch kelmoqda.

Xususan, Yermakning isteʼfosi tinchlik muzokaralari istiqboliga ham yangi shubhalar soldi. Chunki Yermak bu jarayonda muhim rol oʻynagan edi.

54 yoshli Yermak Rossiyaning bosqini boshlanganidan beri Zelenskiy yonida turib, uning oʻng qoʻli va mohir vositachi sifatida muhim siyosiy figuraga aylangan edi.

Ular ilk bor shou-biznes olamida tanishgan. Zelenskiy komediyan boʻlgan, Yermak esa kino prodyuseri va intellektual mulk huquqiga ixtisoslashgan media yuristi edi. Zelenskiy 2019 yilda hokimiyatga kelgan paytda, ular bir-birini ancha yaxshi tanishgan.

Yermak dastlab prezident maslahatchisi sifatida, asosan, tashqi siyosat masalalari bilan shugʻullanish uchun yollangan. 2020 yil fevral oyida u prezident devoni rahbari boʻldi va Ukrainadagi eng nufuzli shaxslardan biriga aylandi. Ammo koʻplar uning qoʻpolligini va mayda-chuyda ishlarni ham oʻzi boshqarishga urinishini tanqid qilishardi.

Rossiyaning 2022 yil fevralidagi toʻliq miqyosli bosqini boshlanganidan keyin u va Zelenskiy oʻrtasidagi munosabat yanada mustahkamlandi.

Ukraina siyosatida Yermak har qanday keragidan ortiq gapirgan yoki Zelenskiyga potensial raqib boʻlishi mumkin boʻlgan amaldorlarni lavozimidan olishi bilan tanilgan qoʻrqinchli qattiqqoʻl ijrochiga aylangan edi. U, shuningdek, urushdagi voqealar boʻyicha hukumatga qaratilgan tanqidlarni oʻziga qabul qilib, Zelenskiyni himoya qilib kelgan.

Lekin soʻnggi vaqtlarda Yermakning Ukrainada juda reytingi pasayib ketgani aytiladi. Ukraina tadqiqot markazi mart oyida oʻtkazgan soʻrovnomaga koʻra, respondentlarning atigi 17,5 foizi unga ishonch bildirgan.

Muxolifat deputatlari Yermakning bu oyda yuzaga chiqqan korrupsiya mojarlosidagi shaxslarga yaqinligi sababli uning isteʼfosini talab qilganidan keyin ham Zelenskiy Yermakni lavozimida qoldirgandi.

Koʻp oʻtmay, Yermak AQSh rasmiylari bilan Jenevada oʻtkazilayotgan muzokaralarda Kiyev delegatsiyasiga rahbarlik qila boshladi. U Rossiya foydasiga haddan tashqari yon bosilgan deb baholangan rejadagi bandlarni yumshatishga harakat qilayotgan edi.

Bu muzokaralar AQSh armiyasi kotibi Daniel P. Driskoll bilan ushbu hafta Kiyevda davom ettirilishi kerak edi. 27 noyabr kuni kechgacha Yermak ushbu muzokaralarda ishtirok etishini bildirgandi.

Garchi u bu ish boʻyicha rasmiy ravishda gumondor sifatida tilga olinmagan boʻlsada, ertasi kuni tongda Yermakning uyi korrupsiya tergovi doirasida tintuv qilindi.

Soʻnggi maʼlumotlarga koʻra, Yermak frontga ketish istagini bildirgan. The New York Post nashriga koʻra, Yermak bu qarorga mustaqil ravishda kelgan.

“Men frontga ketyapman va har qanday topshiriqqa tayyorman. Men halol va odobli insonman”, dedi Yermak va u “Ukrainaga xizmat qilganini” va prezident Vladimir Zelenskiy uchun “muammo yaratishni” istamasligini qoʻshimcha qildi.