Qoʻriqlash boshqarmasi Milliy gvardiyadan IIVga oʻtkazildi
IIV huzuridagi Qoʻriqlash departamentiga yangi boshliq tayinlandi.
Milliy gvardiya Qoʻriqlash bosh boshqarmasi Ichki ishlar vazirligi huzuridagi Qoʻriqlash departamenti etib qayta tashkil etilgan.
28 noyabr kuni “Ichki ishlar organlarining qoʻriqlash sohasidagi faoliyatini amarali tashkil etish chora-tadbirlari toʻgʻrisida”gi Prezident qarori imzolangan.
Prezidentning tegishli farmoyishi bilan IIV huzuridagi Qoʻriqlash departamenti boshligʻi vazifasini bajaruvchi etib polkovnik Shodibekov Qobil Adilovich tayinlangan. Tayinlovga qadar u Toshkent shahar Qoʻriqlash boshqarmasi boshligʻi lavozimida faoliyat yuritgan.
Qarorga koʻra, departament va uning boʻlinmalari zimmasiga quyidagi asosiy vazifalar yuklatiladi:
- shartnoma asosida davlat, oʻta muhim, toifalangan va boshqa obʼektlar, taʼlim muassasalari, jismoniy va yuridik shaxslarning mol-mulki, savdo, xizmat koʻrsatish, koʻngilochar va qurilish obʼektlarini zamonaviy usullar orqali qoʻriqlash;
- qoʻriqlanayotgan obʼektlarda ichki tartib va nazorat oʻtkazish rejimlarini taʼminlash;
- qoʻriqlash faoliyatiga zamonaviy axborot-kommunikatsiya va sunʼiy intellekt texnologiyalarini keng joriy etish.
2026 yil 1 yanvardan qoʻriqlovga olingan banklar, yirik ishlab chiqarish korxonalari, mahalliy hokimliklar va boshqa obʼektlarning fuqarolar kirish va chiqish joylariga bosqichma-bosqich shaxsning yuzini tanib olish imkoniyatiga ega texnik vositalar oʻrnatiladi.