Eng yaxshi soliq toʻlovchi mahallalar ragʻbatlantiriladi

Eng yaxshi soliq toʻlovchi deb topilgan mahallalar ragʻbatlantiriladi.

“Soliqlarning yigʻiluvchanlik darajasini oshirish va faol soliq toʻlovchilarni ragʻbatlantirish chora-tadbirlari toʻgʻrisida”gi Prezident qarori (PQ–364-son, 28.11.2025 y.) qabul qilindi.

Qarorga koʻra, 2026 yil 1 yanvardan “Eng yaxshi soliq toʻlovchi mahalla” nominatsiyasi joriy etiladi. Bunda gʻoliblarni aniqlash boʻyicha mezonlar quyidagilar:

- har 1 000 nafar aholiga toʻgʻri keladigan kichik biznes subʼektlari soni;

- har 1 000 nafar aholiga toʻgʻri keladigan kichik biznes subʼektlari tomonidan toʻlangan soliqlar miqdori;

- har 1 000 nafar aholiga toʻgʻri keladigan jismoniy shaxslardan olinadigan daromad soligʻi toʻlovchilar soni;

- har 1 000 nafar aholiga toʻgʻri keladigan oʻzini oʻzi band qilgan fuqarolar soni va ular tomonidan toʻlangan soliqlar miqdori;

- mahalla fuqarolari tomonidan mol-mulk va yer soliqlarining toʻlanganlik darajasi.

“Eng yaxshi soliq toʻlovchi mahalla” nominatsiyasi gʻoliblari uchun quyidagi ragʻbatlantirish choralari joriy etiladi:

- tashabbusli byudjet doirasida ketma-ket 2 marotaba gʻolib deb topilgan mahallalar uchun navbatdagi 2 ta mavsum doirasida loyiha kiritish imkoniyatini cheklash qoidasi qoʻllanmaydi;

- loyihalarni sheriklik asosida moliyalashtirishda ushbu mahallalar aholisi tomonidan loyiha qiymatining 25 foizi moliyalashtirilgan taqdirda, loyiha gʻolib deb topiladi hamda qolgan 75 foizi Davlat byudjetidan moliyalashtiriladi;

- belgilangan mezonlar asosida har yili birinchi 100 talikka kirgan eng yaxshi soliq toʻlovchi mahallalarning har biriga Davlat byudjetidan 2 mlrd soʻm miqdorida mablagʻ tegishlicha Mahallaning ijtimoiy-iqtisodiy muammolarini hal etish jamgʻarmasiga ajratiladi.

2026 yil 1 yanvardan “Ochiq byudjet” portalida jismoniy shaxslar tomonidan toʻlangan soliqlar hisobidan amalga oshiriladigan byudjet xarajatlari maʼlumotlarini oʻzida aks ettiruvchi “Jismoniy shaxslarning soliqlari hisobidan xarajatlar” moduli ishga tushiriladi.

Bunda quyidagilar doimiy ravishda eʼlon qilib boriladi:

- jismoniy shaxs tomonidan muayyan davrda toʻlangan daromad soligʻi, mol-mulk va yer soligʻi toʻgʻrisidagi maʼlumot;

- toʻlangan soliqlar evaziga Davlat byudjetidan amalga oshirilgan xarajatlar toʻgʻrisidagi maʼlumotlar.

2026 yil 1 yanvardan Namanganda yangi soliq boshqaruvi modelini joriy etish boʻyicha quyidagilarni nazarda tutgan holda eksperiment oʻtkaziladi:

- jismoniy shaxslardan olinadigan mol-mulk va (yoki) yer soligʻi boʻyicha 1 mln soʻmdan oshgan soliq qarzdorligini undirishda elektr energiyasining billing tizimi mexanizmidan foydalanishni joriy etish;

- soliq organlari faoliyatini baholashda inson omili taʼsirisiz avtomatik shakllanadigan eng muhim samaradorlik koʻrsatkichlarini joriy etishni tizimli davom ettirish.

2026 yil 1 yanvardan jismoniy shaxslar tomonidan koʻchmas mulklarni ijaraga berishdan olingan daromad boʻyicha toʻlangan soliq toʻliq miqdorda mulk joylashgan tuman (shahar) mahalliy byudjetlariga yoʻnaltiriladi.