Tramp Ukraina mojarosi tez orada tugashi mumkinligini eʼlon qildi
Rossiya va Ukraina delegatsiyalari Abu-Dabida tinchlik oʻrnatish boʻyicha toʻgʻridan-toʻgʻri muzokaralar olib borishi ham xabar qilingan.
AQSh prezidenti Donald Tramp Rossiya-Ukraina mojarosini hal qilish boʻyicha kelishuvga oz qolganini eʼlon qildi.
"Menimcha, biz kelishuvga juda yaqinmiz. Biz buni hal qilamiz", dedi Tramp Oq uy hovlisida jurnalistlarga Shukrona kuni oldidan anʼanaviy marosimda soʻzlagan nutqida (Clash Report iqtibos keltirgan).
Avvalroq Axios oʻz manbasiga tayanib, Rossiya va Ukraina delegatsiyalari Abu-Dabida tinchlik oʻrnatish boʻyicha toʻgʻridan-toʻgʻri muzokaralar olib borishini xabar qilgandi. Rossiya prezidenti matbuot kotibi Dmitriy Peskov bu boradagi xabarlarni kuzatib borayotganini aytdi, ammo uchrashuvni aniq tasdiqlamadi.
Ukraina prezidenti devoni rahbari Andriy Yermak bugun Donald Tramp va uning ukrainalik hamkasbi Vladimir Zelenskiy oʻrtasida kelishuvni yakunlash uchun 27 noyabr kuni uchrashuv boʻlib oʻtishi mumkinligini eʼlon qildi.
Uning soʻzlariga koʻra, asl tinchlik rejasi 28 punktdan 19 punktgacha qisqartirildi, asosiy kelishmovchiliklar hududiy masalalarga qaratilgan.
Eslatib oʻtamiz, Tramp tinchlik rejasi soʻnggi vaqtlarda eng koʻp muhokama qilinmoqda.
Avvalroq AQSh, Ukraina va Yevropa rasmiylari Jenevada uchrashgandi.
Ular tinchlik rejasi boʻyicha muzokaralarni boshlashgan. Ushbu rejada Rossiyaga yon bosilgan deya daʼvo qilingandi.