Toshkentda ariqlar tizimini qayta tiklash ishlari boshlanadi
Bu tizim koʻp yillar davomida shaharning suv taqsimotini taʼminlab, qulay mikroiqlim yaratib kelgan.
Toshkentda anʼanaviy sugʻorish kanallari tarmogʻi - ariqlar tizimini qayta tiklash ishlari boshlanadi. Bu haqda poytaxt hokimligi xabar berdi.
Bu tizim koʻp yillar davomida shaharning suv taqsimotini taʼminlab, qulay mikroiqlim yaratib kelgan.
Toshkent shahar hokimligi Kanallardan foydalanish va ularga tutash hududlarni obodonlashtirish boshqarmasi bilan hamkorlikda ariqlarni bosqichma-bosqich tiklash va zamonaviylashtirish rejasini ishlab chiqmoqda.
Loyiha doirasida quyidagilar amalga oshiriladi:
• mavjud oʻzanlarni tozalash va taʼmirlash;
• shikastlangan qismlarni tiklash;
• atrofdagi hududlarda tartib oʻrnatish;
• kelajakda muntazam foydalanish uchun sharoit yaratish.
Ishning asosiy maqsadi — vaqt sinovidan oʻtgan usullarga tayanib, suv chiqarish va sugʻorish samaradorligini oshirish, changlanishni kamaytirish hamda shahar atrof-muhitining ekologik holatini yaxshilashdan iborat.
2026 yil bahorida boshlanishi moʻljallangan ushbu loyiha poytaxt infratuzilmasini rivojlantirish va aholining turmush sharoitlarini yaxshilash boʻyicha olib borilayotgan tizimli ishlarning bir qismi boʻladi.