Farrux Oʻktamjonov Guliston shahar hokimi etib tasdiqlandi
Avval bu lavozimda Jamoliddin Xodjimanov ishlab kelayotgandi. Sirdaryo hokimi Erkinjon Turdimov shaharda kambagʻallikni qisqartirish, aholi bandligini taʼminlash va boshqa masalalarda kamchilikka yoʻl qoʻyilganini bildirgan.
Guliston shahrida hokim oʻzgardi. Xalq deputatlari shahar kengashining navbatdan tashqari sessiyasi oʻtkazildi.
Tahliliy-tanqidiy ruhda oʻtgan sessiya ishida viloyat hokimi vazifasini bajaruvchi Erkinjon Turdimov ishtirok etdi.
Erkinjon Turdimov oʻz nutqida shaharda qator sohalarda qoloqlikka yoʻl qoʻyilayotganligi, xususan, kambagʻallikni qisqartirish, aholi bandligini taʼminlash, yangi investitsion loyihalarni ishlab chiqish va amalga oshirish, eksport borasida shahar birinchi rahbarining harakatlari yetarli emasligini bildirdi.
Sessiyada tashkiliy masala koʻrildi.
Shu kunga qadar shahar hokimi lavozimida ishlab kelgan Xodjimanov Jamoliddin Xusniddinovich egallab turgan lavozimidan ozod etildi.
Deputatlar tomonidan shu kunga qadar Sirdaryo viloyati IIB boshligʻining birinchi oʻrinbosari lavozimida faoliyat olib borgan Oʻktamjonov Farrux Oʻktamjonovich nomzodi Guliston shahar hokimi lavozimiga tasdiqlandi.