AQSh, Ukraina va Yevropa rasmiylari Jenevada uchrashdi
Ular tinchlik rejasi boʻyicha muzokaralarni boshlashgan. Ushbu rejada Rossiyaga yon bosilgan deya daʼvo qilingandi.
AQSh, Ukraina va Yevropa rasmiylari tinchlik rejasi boʻyicha muzokaralar uchun Jenevada uchrashdi.
Bu uchrashuv Ukraina va uning ittifoqchilari mazkur hujjatda Rossiyaga yon bosadigan bandlar bor deb daʼvo qilganidan soʻng oʻtkazildi.
21 noyabr kuni AQSh prezidenti Donald Tramp Ukraina prezidenti Vladimir Zelenskiyga ushbu 28 banddan iborat rejani maʼqullash uchun 27 noyabrgacha vaqt borligini aytdi. Rejada Ukraina hududining bir qismini berishi, harbiy kuchlarini cheklashi va NATOga qoʻshilish boʻyicha harakatlardan voz kechishi talab qilinadi.
Koʻplab ukrainaliklar, jumladan, front chizigʻida jang qilayotgan askarlar uchun bunday shartlar deyarli toʻrt yillik janglardan soʻng taslim boʻlish bilan barobar hisoblanadi. Tramp urushni tugatish boʻyicha hozirgi taklif uning yakuniy taklifi emasligini maʼlum qildi.
Tinchlik rejasi eʼlon qilinganidan beri uni kim tuzishda ishtirok etgani borasida koʻplab tushunmovchiliklar yuzaga keldi. Yevropalik ittifoqchilar ular bilan maslahatlashilmaganini bildirdi.
Jenevada rasmiylar yigʻilar ekan, Germaniya kansleri Fridrix Mers maqsad Ukraina qabul qilishi mumkin boʻlgan va Rossiya bilan muzokaralarda qoʻllanishi mumkin boʻlgan reja ishlab chiqish kerakligini aytdi. Bu vaqt talab qiladi, deb qoʻshimcha qildi u.
"Prezident Tramp yaqin kunlarda xohlagan yechimga erishamiz deganiga ishonchim komil emas", dedi Mers Yoxannesburgdagi G20 yigʻilishida.
Jenevaga yoʻl olishdan oldin, AQSh davlat kotibi Marko Rubio X ijtimoiy tarmogʻida Vashington ushbu rejani oʻzi ishlab chiqqanini taʼkidladi.
Polsha bosh vaziri Donald Tusk X platformasida Ukraina ittifoqchilari rejani ishlab chiqishga tayyor ekanini, ammo uning qanday yaratilgani muhim ekanini aytdi.
Rubio va AQShning maxsus vakili Stiv Uitkoff yakshanba kuni shoshilinch tarzda Jeneva uchrashuviga yetib kelishdi. “Biz yakuniy tafsilotlarni aniqlab olishga va Ukrainaga qulay boʻlgan kelishuv loyihasini tayyorlashga umid qilamiz,” dedi AQSh rasmiysi. “Ikki prezident uchrashmaguncha hech narsa kelishilmaydi,” dedi u, Tramp va Zelenskiyga ishora qilib.
Zelenskiy Jenevadagi diplomatik saʼy-harakatlarni mamnuniyat bilan kutib oldi va ularning natija berishiga umid bildirdi. Uchrashuvdan oldin AQSh va Ukraina rasmiylari oʻrtasida konstruktiv muzokaralar boʻlib oʻtdi.
Turkiya prezidenti Rajab Toyyip Erdoʻgʻon dushanba kuni Rossiya prezidenti Vladimir Putin bilan Ukraina masalasida gaplashishini va natijalarini Yevropa hamda AQSh ittifoqchilari bilan boʻlishishini aytdi.
Ukraina uchun xavfli palla
Rossiyaning koʻplab asosiy talablarini oʻz ichiga olgan va Ukrainaga faqat xavfsizlik kafolatlarini noaniq tarzda taklif qiladigan ushbu loyiha mamlakat uchun nihoyatda xavfli bir davrda paydo boʻldi.