OAV: AQSh va Rossiya Ukraina uchun maxfiy "tinchlik rejasi" tayyorladi
28 banddan iborat reja toʻrtta yoʻnalishni qamrab oladi: Ukrainadagi urushni tugatish, xavfsizlikni kafolatlash, Yevropada barqarorlikni mustahkamlash va AQShning Rossiya va Kiyev bilan kelajakdagi munosabatlarini qurish.
OAV xabariga koʻra, AQSh va Rossiya Ukraina uchun maxfiy "tinchlik rejasi"ni tayyorlamoqda.
AQSh va Rossiya hukumatlari Ukrainadagi urushni tugatish uchun keng koʻlamli rejani yashirincha ishlab chiqmoqdalar, deb xabar beradi Axios.
Muzokaralar qatʼiy maxfiylikda olib borilmoqda va hujjat Tramp maʼmuriyatining Gʻazodagi mojaroni hal qilishdagi muvaffaqiyatli tajribasidan "ilhomlangan".
28 banddan iborat reja toʻrtta sohani qamrab oladi: Ukrainadagi urushni tugatish, xavfsizlikni kafolatlash, Yevropada barqarorlikni mustahkamlash va AQShning Rossiya va Kiyev bilan kelajakdagi munosabatlarini qurish.
AQSh prezidentining maxsus vakili Stiven Uitkoff hujjatni tayyorlashda faol ishtirok etmoqda. Oktabr oyida u Mayamida Kreml vakili Kirill Dmitriyev bilan uch kunlik muzokaralar oʻtkazdi.
Reja tafsilotlari keyinchalik ommaviy axborot vositalarida paydo boʻldi. Financial Times gazetasining anonim manbalarga tayanib xabar berishicha, taklif quyidagilarni oʻz ichiga oladi:
— qolgan Donbassni topshirish va Ukraina armiyasini ikki baravar qisqartirish;
— rus tiliga rasmiy maqom berish;
— Moskva Patriarxatining pravoslav cherkovini tan olish;
— AQSh harbiy yordamini kamaytirish;
— xorijiy qoʻshinlarni joylashtirishni taqiqlash.
Nashr taʼkidlaganidek, hujjatni koʻrib chiqqan Kiyevdagi rasmiylar uning asosan Moskvaning maksimalist talablariga mos kelishiga va jiddiy tuzatishlarsiz qabul qilinishi mumkin emasligiga ishonishadi.
19 noyabr kuni Ukraina rahbari "muzokaralarni faollashtirish" uchun Turkiyaga keldi. Anqarada Zelenskiy bilan uchrashuvidan soʻng, prezident Erdoʻgʻon mamlakatlarni muzokaralar stoliga qaytishga chaqirdi.