Jizzax viloyatida pulli avtoturargohlar tashkil etiladi
Xizmat avtomobillari hamda maxsus transportlar (shuningdek, nogironligi bor haydovchilarga tegishli ulovlar) uchun toʻlovlar undirilmaydi.
Jizzaxda pulli toʻxtash joylarini takomillashtirish boʻyicha viloyat hokimi qarori eʼlon qilindi. Qaror 2025 yil 18 noyabr kuni qabul qilingan.
Qarorga koʻra, hokimliklar tasarrufidagi zaxira yer maydonlarida tashkil etiladigan pullik avtoturargohlar roʻyxati va narxlar tasdiqlandi.
Bunda, davlat tashkilotlarining xizmat avtomobillari hamda maxsus transport vositalari (shuningdek, nogironligi bor haydovchilarga tegishli transport vositalari) uchun toʻlovlar undirilmaydi. Bir mashina uchun toʻxtab turish narxi 5 ming soʻmni tashkil etadi. Tushgan pullar mahallalar jamoat joylari va yashash xonadonlarida xavfsiz muhit yaratish, fuqarolar hayoti, sogʻligi va mol-mulkiga har qanday tajovuzlarning oldini olish maqsadida huquqbuzarliklar profilaktikasiga, zamonaviy raqamli texnologiyalar va texnik vositalarni keng joriy etish tadbirlariga yoʻnaltirish; mehnat qonunchiligiga muvofiq obodonlashtirish boshqarmasi xodimlari tomonidan ushbu avtoturargoh hududlarini muntazam ravishda tozalik ishlarini olib borilgani uchun ishchi xodimlarni moddiy ragʻbatlantirishga sarflanadi.
Mazkur qaror eʼlon qilingan kundan eʼtiboran kuchga kirishi belgilangan.