PSJ va Mbappe oʻrtasida yirik mojaro yuzaga keldi

Parij Sen-Jermen (PSJ) va klub sobiq futbolchisi Kilian Mbappe oʻrtasidagi huquqiy mojaro yanada keskinlashdi: tomonlar bir-biridan ulkan miqdorda tovon talab qilmoqda.

Mbappe klubdan 260 million yevro tovon toʻlashni talab qilmoqda, PSJ esa 440 million yevro undirishga urinmoqda.

Fransiyalik yulduz hujumchi va uning sobiq klubi oʻrtasidagi nizo toʻlanmagan maoshlar bilan bogʻliq boʻlib, masala sanoat sudi tomonidan koʻrib chiqildi.

Sud majlisiga kelmagan Mbappe avval PSJ uni 55 million yevro miqdorida qarzdor deb daʼvo qilgan edi. Endi esa u klubdan 260 million yevrodan ortiq mablagʻ talab qilmoqda. Uning fikricha, PSJ unga bu pulni toʻlashi shart, chunki u bilan tuzilgan muddatli shartnoma doimiy shartnoma sifatida qayta tasniflanishi kerak. Bunday tasniflanish esa asossiz ishdan boʻshatish, toʻlanmagan ish haqi, bonuslar va nafaqa toʻlovi uchun kompensatsiyani yuzaga keltiradi.

PSJ esa, oʻz navbatida, hujumchidan jami 440 million yevro undirishga urinmoqda. Bu summaga 180 million yevrolik “imkoniyat yoʻqotilishi” ham kiradi — klubning taʼkidlashicha, Mbappe 2023 yil iyul oyida Saudiya Arabistonining “Al-Hilol” klubidan kelgan 300 million yevrolik taklifni rad etib, erkin agent sifatida ketgani sababli transfer amalga oshmay qolgan.

PSJ oʻz bayonotida, muzokaralar va shartnoma bajarilishida halollik tamoyillari buzilgani, shuningdek, klub obroʻ-eʼtiboriga va imijiga yetkazilgan zararni qoplashni ham talab qilayotganini maʼlum qildi.

Sud qarori kelasi oyda eʼlon qilinishi kutilmoqda.

PSJning taʼkidlashicha, 2023–24 yilgi mavsum boshlanishidan oldin Mbappe shartnomani uzaytirishdan bosh tortganidan keyin vaqtincha chetlashtirilganida, jamoaga qaytishi uchun u maʼlum bonuslardan voz kechishga ogʻzaki rozi boʻlgan.

“Sudda klub 2022 yil iyulidan 2023 yil iyunigacha, qariyb 11 oy davomida futbolchi shartnomani uzaytirish niyati yoʻqligini yashirib, klubni transfer boʻyicha har qanday imkoniyatdan mahrum qilganini koʻrsatuvchi dalillarni taqdim etdi,” — deyiladi klub bayonotida.

Mbappe PSJni axloqiy tazyiqda ayblar ekan, klubda oʻziga nisbatan qoʻllanilgan “lofting” amaliyotini qoraladi. Lofting — Fransiyada sport, intizomiy yoki maʼmuriy sabablar bilan futbolchini asosiy jamoadan ajratib qoʻyish amaliyotini bildiradi.

Mbappé va PSJ oʻrtasidagi munosabat chuqur taranglik bilan yakunlangan. Klub unga 2022 yilda tarixidagi eng yuqori maoshli shartnomani taklif qilib, unga katta ishonch bildirgan edi.

Oradan bir yil oʻtib, Mbappé klubni hayratda qoldirib, shartnomani uzaytirmasligini maʼlum qildi.

Shartnomani uzaytirmasligini bildirganidan soʻng, Mbappe yozgi Yaponiya va Janubiy Koreya safariga olinmadi va zahiradagi futbolchilar bilan mashgʻulot oʻtkazishga majbur qilindi. Klub uni 2024 yilda tekin ketkazishdan koʻra sotib yuborishni afzal koʻrishini bildirdi, biroq Mbappe "Al-Hilol" taklifini rad etdi.