OAV: Ogʻir kasallikka chalinganlarga AQSh vizasi berilmasligi mumkin
Yurak-qon tomir va nafas olish tizimi kasalliklari, saraton, diabet, metabolik va nevrologik kasalliklar vizaga rad javobi uchun asos boʻlish ehtimoli bor. Bu haqda AQShning yetakchi nashrlaridan biri yozdi.
AQSh Davlat kotibi Marko Rubio AQSh elchixonalariga vizaga murojaat etuvchilarning salomatlik holatini koʻrib chiqishni buyurdi. Bu haqda 6 noyabr kuni Rubiodan AQSh elchixonalari va konsulliklariga yuborilgan tegishli koʻrsatmani olgan The Washington Post nashri xabar berdi.
"Sogʻliqni saqlashning ayrim holatlari, jumladan yurak-qon tomir va nafas olish tizimi kasalliklari, saraton, diabet, metabolik va nevrologik kasalliklar" viza berishni rad etish uchun asos boʻlishi mumkin.
Rubio buni "yuz minglab dollarlar" miqdorida davolash narxini koʻrsatish bilan oqladi. The Washington Post manbalariga koʻra, ushbu hujjat AQSh Davlat departamenti siyosat rahbariyati tomonidan ishlab chiqilgan va xodimlar tomonidan odatiy tekshiruvdan oʻtmagan.
"Ushbu yoʻriqnomalar konsullik xodimlariga immigratsiya va oddiy vizani sogʻligʻiga koʻra rad etish uchun keng ixtiyoriylik beradi, ular hech qachon rad etish uchun asos boʻlmagan", dedi immigratsiya boʻyicha advokat Vik Goel nashrga.
Oq uy matbuot kotibi Anna Kellining taʼkidlashicha, Davlat departamenti 100 yil davomida amerikalik soliq toʻlovchilarga moliyaviy yuk boʻlishi mumkin boʻlgan, masalan, hukumat tomonidan moliyalashtiriladigan sogʻliqni saqlash xizmatiga muhtoj boʻlganlarning Qoʻshma Shtatlarga kirishini cheklab qoʻygan.
Eslatib oʻtamiz, yaqinda Oʻzbekiston AQSh fuqarolari uchun vizasiz tartibni joriy etdi.
Bu ikki davlat munosabatlarini yanada mustahkamlash, savdo, iqtisodiyot, madaniyat, gumanitar va turizm sohalarida hamkorlikni rivojlantirish uchun qulay sharoitlar yaratishga qaratilgan.