Suv hisoblagichlar boʻyicha taqiq: rasmiy tushuntirish berildi
“Novator” va “Eko Nom” kabi suv hisoblagichlarini oʻrnatish taqiqlangani maʼlum boʻlgandi. Ushbu cheklov avval oʻrnatilgan qurilmalarga taalluqli emas.
“Novator” va “Eko Nom” kabi suv hisoblagichlari modellari uchun muvofiqlik sertifikatlari muddati tugaganligi sababli, endilikda mazkur hisoblagichlarni sotib olish, oʻrnatish va ulardan foydalanish taqiqlandi.
Biroq bu, ilgari oʻrnatilgan va plombalangan hisoblagichlardan foydalanishni taqiqlamaydi. "Oʻzsuvtaʼminot" bu haqda maʼlumot berdi.
Sababi bunday hisoblagichlar sertifikatlari amal qiladigan davrida oʻrnatilgan va ularning xizmat muddatlari ham inobatga olingan.
Abonentlar bunday turdagi hisoblagichlarini almashtirishlari shart emas, agar u avval belgilangan tartibda oʻrnatilgan va plombalangan boʻlsa.
Bunday holatlarda hech qanday jarima yoki qayta hisob-kitob qoʻllanilmaydi.
Mazkur maʼlumot faqat axborot berish maqsadida eʼlon qilindi. Yaʼni, abonentlar soxta yoki sertifikatsiz yangi hisoblagichlarni xarid qilmasliklari uchun ogohlantirilmoqda
“Oʻzsuvtaʼminot” AJ isteʼmolchilarga yangi suv hisoblagichlarini xarid qilishda amal qiluvchi muvofiqlik sertifikati va davlat qiyoslov belgisining mavjudligiga eʼtibor berishni tavsiya qilgan.
Avvalroq “EKO NOM” va “Novator” suv hisoblagichlaridan foydalanish taqiqlangani xabar berilgandi. Ularga berilgan sertifikat muddati tugagan.