Isroil prezidenti kutilmagan bayonot bilan chiqdi

Isroil prezidenti Ishoq Hersog falastinliklarga qarshi bosqinchi zoʻravonliklar toʻxtatilishi kerakligini aytdi.

Isroil prezidenti falastinliklarga nisbatan zoʻravonliklarini qoralab, bu harakatlarga chek qoʻyish zarurligini taʼkidladi.

Hersog va yuqori lavozimli harbiy amaldorlar chorshanba kuni Iordan daryosining gʻarbiy sohilida yahudiy bosqinchilar tomonidan falastinliklarga qarshi uyushtirilgan hujumlarni qoralab, bosib olingan hududda tobora kuchayib borayotgan zoʻravonlik toʻlqiniga chek qoʻyishga chaqirdi.

Prezident bu hujumlarni “shok va jiddiy holat” deb atadi. Hersogning lavozimi asosan ramziy boʻlsa-da, u mamlakat uchun axloqiy yoʻnalish beruvchi va birlashtiruvchi kuch sifatida qaraladi.

Hersog zoʻravonlikni “bir nechta shaxslarning ishi” deb atab, bu harakatlar “qizil chiziqni kesib oʻtdi” dedi va ijtimoiy tarmoqlarda “barcha davlat organlari bu hodisani butunlay yoʻq qilish uchun qatʼiy choralar koʻrishi kerak” deb yozdi.

Uning bu soʻzlari, shuningdek, ikki yuqori harbiy amaldorning chiqishlari, 11 noyabr kuni oʻnlab niqobli isroillik bosqinchilar Beit Lid va Deir Sharaf falastin qishloqlariga hujum qilib, avtomobillar va boshqa mol-mulkni yoqib yuborgani hamda isroillik askarlar bilan toʻqnashuv sodir boʻlganidan keyin bildirildi.

Isroil armiyasi bosh shtabi rahbari Iol Zamir ham Hersogning fikrlarini qoʻllab-quvvatlab, “biz qonunlarga boʻysunuvchi jamoatchilik obroʻsini bulgʻayotgan jinoyatchilarning ozchilik harakatlariga toqat qilmaymiz” dedi.

Yahudiy rasmiysi armiyaning bosqinchilar tomonidan sodir etilgan zoʻravonliklarni toʻxtatishga qatʼiy sodiqligini taʼkidlab, bu harakatlarni “Isroil qadriyatlariga zid” deb atadi va ular “bizning kuchlarimizni oʻz vazifasini bajarishdan chalgʻitadi” dedi.

Politsiya toʻrt nafar isroillikning qoʻlga olinganini, armiya esa toʻrt nafar falastinlik jarohat olganini maʼlum qildi.

Politsiyaning aytishicha, gumondorlardan uchtasi qoʻyib yuborilgan, biroq biri — voyaga yetmagan yigit, oʻt qoʻyish va hujumda ayblanayotgan shaxs — sud buyrugʻiga binoan yana olti kun hibsda qoladi. Politsiya, qoʻyib yuborilgan uch nafar shaxsning ham harakatlari boʻyicha “jinoyatchilarni kelib chiqishidan qatʼi nazar javobgarlikka tortish maqsadida” tergov davom etayotganini bildirdi.

Birlashgan Millatlar Tashkiloti gumanitar idorasi oʻtgan hafta bergan hisobotda aytilishicha, 2024 yil oktabr oyida Gʻarbiy Sohilda isroillik bosqinchilar tomonidan falastinliklarga qarshi sodir etilgan hujumlar soni 2006 yildan beri kuzatishlar boshlanganidan buyon eng yuqori darajaga chiqqan — jami 260 dan ortiq hujum qayd etilgan.

Falastinliklar va inson huquqlari faollari esa Isroil armiyasi va politsiyasini bosqinchilar hujumlarini toʻxtata olmagani uchun tanqid qilmoqda.