Isroilni qattiq himoya qilgani uchun taniqli aktrisa mukofotlandi

Isroilni qattiq himoya qilgan taniqli aktrisa mukofotlandi.

Oʻtgan yil Argentina prezidenti Xaver Mileyi ushbu mukofotni qoʻlga kiritgan edi.

Gollivud aktrisasi Gal Gadot Isroilning nufuzli 2026 yilgi Genesis mukofoti bilan taqdirlandi. U bu mukofotga “shaxsiy va professional xavf-xatarlarga qaramay Isroilni qatʼiy himoya qilgani” uchun sazovor boʻldi.

Har yili 1 million dollarlik ushbu mukofot oʻz kasbiy yutuqlari, insoniyatga qoʻshgan hissasi va yahudiy qadriyatlariga sadoqati bilan ajralib turgan shaxslarga beriladi. Genesis mukofoti jamgʻarmasining maʼlumotiga koʻra, Gadot ushbu 1 million dollarlik mukofotni Isroilda “chuqur jismoniy va ruhiy jarohatlarni tuzatish yoʻlida ishlayotgan” nodavlat tashkilotlarga ehson qilmoqchi.

Ushbu mukofotni qoʻlga kiritganlar orasida Oliy sud sobiq sudyasi Rut Beyder Ginzburg, mashhur qoʻshiqchi Barbra Streisand, rejissyor Stiven Spilberg ham bor. Avvalgi gʻoliblarning koʻpchiligi mukofot pullarini xayriya ishlariga yoʻnaltirgan.

“Men Genesis mukofotini olishdan faxrlanaman va mendan avval bu sharafga sazovor boʻlgan ajoyib insonlar qatorida turishimdan minnatdorman. Men yahudiyligimdan, isroillik ekanligimdan faxrlanaman. Men oʻz mamlakatimni sevaman va ushbu mukofotni Isroilning sogʻayishiga yordam beradigan tashkilotlarga hamda rahmdillikning old saflarida xizmat qilayotgan ajoyib odamlarga bagʻishlayman” — dedi Gadot bergan bayonotida.

“Gal Gadotning axloqiy yuksakligi va Isroilga boʻlgan qatʼiy muhabbati millionlab odamlarga ilhom berdi,” — dedi Genesis mukofoti jamgʻarmasi hammuassisi va raisi Sten Polovets oʻz bayonotida. — “Bu mukofot uning jasorati va axloqiy qatʼiyatini eʼtirof etadi — shaxsiy va professional xavflarga qaramay Isroilni qatʼiy himoya qilgani, asirlar uchun olib borgan kurashi, terror qurbonlariga rahm-shafqati va HAMAS boshlagan bu dahshatli urushdagi barcha begunoh qurbonlarga nisbatan hamdardligi uchun. Gadotning Genesis mukofotini shifo va birlashuv missiyasiga aylantirish qarori mukofotning asl maqsadini — yutuqlarni eʼtirof etish va ularni yaxshilik yoʻlida yoʻnaltirish gʻoyasini — mukammal ifodalaydi".