Oʻzbekistonda islomiy bank faoliyatini joriy qilish boʻyicha qonun loyihasi maʼqullandi
Bu yashirin iqtisodiyot ulushini kamaytirishga hamda xorijiy investitsiyalarni jalb qilishga xizmat qiladi.
Qonunchilik palatasi yigʻilishida Oʻzbekistonda islomiy bank faoliyatini joriy qilishga qaratilgan qonun loyihasi koʻrib chiqildi.
Ushbu qonun loyihasi bilan Oʻzbekistonning ayrim qonun hujjatlariga islomiy bank faoliyatini amalga oshirishning huquqiy asoslarini belgilovchi qoʻshimcha va oʻzgartirishlar kiritilmoqda.
Muhokamalar davomida deputatlar tomonidan islomiy bank va moliya operatsiyalariga oid huquqiy normalar loyihada aks ettirilganligi maʼqullandi. Shuningdek, moliya standartlari hamda investitsiyaviy depozitlarga oid normalar boʻyicha avval bildirilgan takliflar inobatga olinganligi xalq vakillari eʼtiborida boʻldi.
Mazkur qonun loyihasining qabul qilinishi mamlakatimizda islomiy bank xizmatlarini bosqichma-bosqich joriy etishga, yashirin iqtisodiyot ulushini kamaytirishga hamda xorijiy investitsiyalarni jalb qilishga xizmat qiladi.
Qonun loyihasi deputatlar tomonidan qabul qilindi va Senatga yuborildi.