“Grin karta” dasturi hali ochilgani yoʻq – AQSh hukumati
Endi lotereyada qatnashmoqchi boʻlgan har bir ishtirokchidan 1 dollardan pul undiriladi.
Internetda “DV-2027 uchun roʻyxatdan oʻtish boshlandi” degan soxta xabarlar tarqalgan. Bu xabarlar yolgʻon, deb xabar berdi AQSh davlat departamenti.
DV-2027 dasturi boʻyicha rasmiy roʻyxatdan oʻtish sanasi va jarayon haqidagi maʼlumotlar faqat AQSh davlat departamenti tomonidan eʼlon qilinadi.
AQSh Davlat departamenti Diversity Visa (DV) dasturiga roʻyxatdan oʻtish jarayonida ayrim oʻzgarishlarni joriy etmoqda. Shuningdek, endi lotereyada qatnashmoqchi boʻlgan har bir ishtirokchidan 1 dollar miqdorida pul undiriladi.
DV-2027 dasturi uchun roʻyxatdan oʻtish boshlanish sanasi va tanlov natijalarini Entry Status Check (ESC) orqali koʻrish mumkin boʻladigan sana yaqin vaqt ichida eʼlon qilinadi.