AQSh va S5+1 sammiti Samarqandda oʻtkazilishi mumkin

Oʻzbekiston prezidenti Shavkat Mirziyoyev Oq uyda boʻlib oʻtgan Markaziy Osiyo mamlakatlari va AQSh yetakchilarining S5+1 formatidagi sammitida navbatdagi sammitni Samarqand shahrida oʻtkazishni taklif qildi.

Donald Tramp raisligida oʻtgan tadbirda Qozogʻiston prezidenti Qosim-Joʻmart Toʻqayev, Qirgʻiziston prezidenti Sadir Japarov, Tojikiston prezidenti Imomali Rahmon va Turkmaniston prezidenti Serdar Berdimuhamedov ham qatnashdi.

S5+1 formati doirasidagi hamkorlikni yanada kengaytirish maqsadida Oʻzbekiston rahbari qator tashabbuslarni ilgari surdi:

• ishtirokchi mamlakatlarda navbati bilan joylashtiriladigan doimiy faoliyat yuritadigan kotibiyatni taʼsis etish;
• davlat idoralari, kompaniyalar va moliya institutlari oʻrtasida tizimli muloqotni taʼminlash maqsadida vazirlar darajasida Investitsiyalar va savdo boʻyicha muvofiqlashtiruvchi kengash tuzish;
• “Markaziy Osiyo investitsiyaviy sherikligi” jamgʻarmasini ishga tushirish;
• Markaziy Osiyoni Janubiy Kavkaz va Yevropa bilan bogʻlaydigan yirik transport-kommunikatsiya va energetika loyihalarini amalga oshirishda AQSh bilan faol ishlash;
• muhim minerallarni qidirish, qazib olish va chuqur qayta ishlash borasidagi saʼy-harakatlarni samarali muvofiqlashtirish;
• tayyor mahsulotlarni global yetkazib berish zanjirlariga kiritish uchun Maxsus qoʻmitani tuzish;
• mintaqa qishloq xoʻjaligini Amerika texnologiyalarini joriy etgan holda modernizatsiya qilish maqsadida Mintaqaviy agrotexnologik innovatsiyalar sherikligini tashkil etish;
• gumanitar aloqalarni mustahkamlash maqsadida AQShning yetakchi muzeylarida Markaziy Osiyo mamlakatlarining madaniy merosiga bagʻishlangan qoʻshma koʻrgazmalarni tashkil etish.

Sammit yakunida koʻp tomonlama hujjatlar qabul qilindi.