Andijonda 649 nafar masʼul xodim intizomiy javobgarlikka tortildi

Andijon viloyatida mingga yaqin mahallalarda sodir etilgan jinoyatlar yuzasidan xizmat tekshiruvlari oʻtkazildi. Natijada 649 nafar xodim intizomiy javobgarlikka tortilgan. Bu haqda Xalq deputatlari Andijon viloyati kengashi qarorida aytiladi.

Qaror 2025 yil 6 noyabr kuni eʼlon qilingan.

Unga koʻra, viloyatda 9 oyida 6.709 ta jinoyatlar roʻyxatga olingan boʻlib, shundan 2.010 tasi oldini olish mumkin boʻlgan, 2.015 tasi aniqlanadigan, 2.684 tasi axborot texnologiyalar sohasidagi jinoyatlarni tashkil etgan. Oldini olish mumkin boʻlgan 2.010 ta jinoyatlarning 1.011 tasi mahalla hududida oldini olish mumkin boʻlgan jinoyatlar hisoblanadi.

Sodir etilgan 974 ta mahalla hududida oldini olish mumkin boʻlgan jinoyatlar boʻyicha xizmat tekshiruvlari oʻtkazilgan.

Mahalla hududida oldini olish mumkin boʻlgan jinoyatlarning 476 tasi oʻgʻirlik, 134 tasi yengil tan jarohati yetkazish, 114 tasi oʻrtacha tan jarohati yetkazish, 50 tasi ogʻir tan jarohati yetkazish, 23 tasi talonchilik, 34 tasi oilaviy zoʻravonlik, 19 tasi qotillik, 27 tasi bezorilik, 16 tasi nomusga tegish va boshqa jinoyatlarni tashkil etgan.

Ushbu davr mobaynida 176 nafar yoshlar, 48 nafar voyaga yetmaganlar va 60 nafar ayollar tomonidan jinoyatlar sodir etilgan. Mazkur jinoyatlar boʻyicha oʻtkazilgan xizmat tekshiruvlari natijasiga koʻra, 649 nafar masʼul xodimlar intizomiy javobgarlikka tortilib, 4 ta jinoyat ishi qoʻzgʻatilgan.

Intizomiy jazolarning 342 tasi hayfsan, 273 tasi tanbeh, 28 tasi ishdan boʻshatish, 4 tasi oylik ish haqidan ushlab qolish, 2 tasi qattiq hayfsan jazolarini tashkil etgan.

Shuningdek, intizomiy jazolarning 105 tasi mahalla raislariga, 214 tasi IIB xodimlariga, 48 tasi maktab va maktabgacha taʼlim xodimlariga, 21 tasi yoshlar ishlari agentligi xodimlari va boshqa soha vakillariga qoʻllanilgan.