Putin yadroviy sinovlarga tayyorgarlik uchun takliflar kiritishni buyurdi
3 noyabr kuni esa prezident Tramp Qoʻshma Shtatlar "yadroviy qurollar qanday ishlashini koʻrish uchun" sinovlar oʻtkazish niyatida ekanligini tasdiqlagan.
Rossiya prezidenti Vladimir Putin Xavfsizlik Kengashi yigʻilishida yadroviy qurol sinovlariga tayyorgarlik koʻrishni boshlash boʻyicha takliflar kiritishni buyurdi.
Rossiya prezidenti Xavfsizlik Kengashi aʼzolari bilan uchrashuvda tegishli buyruqni chiqardi.
"Men Tashqi ishlar vazirligi, Rossiya Federatsiyasi Mudofaa vazirligi, maxsus xizmatlar va tegishli fuqarolik idoralariga ushbu masala boʻyicha qoʻshimcha maʼlumot toʻplash, Xavfsizlik Kengashida tahlil oʻtkazish va yadroviy qurol sinovlariga tayyorgarlik koʻrishni boshlash boʻyicha kelishilgan takliflarni taqdim etish uchun barcha imkoniyatlarni ishga solishni buyuraman", dedi Rossiya rahbari.
Vladimir Putin Rossiya rahbariyati Yadroviy sinovlarni taqiqlash toʻgʻrisidagi keng qamrovli shartnoma qoidalaridan chetga chiqishni rejalashtirmayotganini, ammo agar shartnoma ishtirokchilari boʻlgan davlatlar sinovlar oʻtkazsa, Rossiya "tegishli va yetarli javob choralarini koʻrishi kerakligini" taʼkidladi.
Kreml matbuot kotibi Dmitriy Peskovning soʻzlariga koʻra, Vladimir Putin yadroviy sinovlarning amalga oshirilishini oʻrganishni buyurgan.
"Taʼkidlamoqchimanki, prezident sinovga tayyorgarlik koʻrishni boshlash haqida buyruq bermagan. Prezident bunday sinovlarga tayyorgarlik koʻrishni boshlashning maqsadga muvofiqligini tekshirishni buyurdi", deydi Peskov.
3 noyabr kuni Tramp Qoʻshma Shtatlar "yadroviy qurollar qanday ishlashini koʻrish uchun" yadroviy sinovlar oʻtkazish niyatida ekanligini tasdiqladi. U bu qarorni boshqa yadroviy kuchlarning faoliyati bilan bogʻladi.
"Rossiya sinov oʻtkazishini eʼlon qildi. Agar eʼtibor bergan boʻlsangiz, Shimoliy Koreya ham doimo sinov oʻtkazadi. Boshqa davlatlar ham sinov oʻtkazadi", deb taʼkidladi u.
"Biz yadroviy sinov oʻtkazmaydigan yagona mamlakatmiz. Men sinov oʻtkazmaydigan yagona mamlakat boʻlishni istamayman", dedi AQSh prezidenti.
Muxbir Rossiya va Xitoy yadroviy qurol sinovdan oʻtkazmasligini taʼkidlaganida, Tramp: "Ular bu haqda gapirishmaydi", deb javob berdi.