Oʻzbekiston AQSh fuqarolari uchun vizasiz tartibni joriy etdi
Bu ikki davlat munosabatlarini yanada mustahkamlash, savdo, iqtisodiyot, madaniyat, gumanitar va turizm sohalarida hamkorlikni rivojlantirish uchun qulay sharoitlar yaratishga qaratilgan.
2026 yil 1 yanvardan boshlab Amerika Qoʻshma Shtatlari fuqarolari Oʻzbekistonga 30 kungacha boʻlgan muddatga vizasiz kirish huquqiga ega boʻladilar.
Ushbu tartib 2025 yil 3 noyabrdagi 203-sonli Prezident farmoni bilan belgilangan boʻlib, u Oʻzbekiston va AQSh oʻrtasidagi munosabatlarni yanada mustahkamlash hamda savdo, iqtisodiyot, madaniyat, gumanitar va turizm sohalarida hamkorlikni rivojlantirish uchun qulay sharoitlar yaratishga qaratilgan.
"Yangi siyosat ikki davlat oʻrtasidagi oʻzaro tushunishni chuqurlashtirish hamda biznes, taʼlim va madaniy almashinuvlarni kengaytirish yoʻlidagi muhim qadam hisoblanadi. Vizasiz tartib AQSh fuqarolariga Oʻzbekiston boʻylab erkin sayohat qilish, mamlakatning boy tarixiy merosini kashf etish, shuningdek, uning investitsiya va turizm imkoniyatlarini oʻrganish imkonini beradi", deya izohlangan hujjatda.
Vizalar tartibining liberallashtirilishi AQShdan kelayotgan sayyohlar soni ortishiga, biznes aloqalari mustahkamlanishiga hamda Oʻzbekistonning ochiq va mehmondoʻst mamlakat sifatidagi ijobiy xalqaro imijini yanada mustahkamlashga xizmat qilishi kutilmoqda.