Tanzaniya prezidenti saylovda salkam 98 foiz ovoz bilan gʻalaba qozondi
Biroq saylov kuzatuvchilari va Yevropa parlamenti aʼzolari ovoz berish jarayonining shaffofligiga shubha bildirishgan. Mamlakatda yirik namoyishlar boʻlib oʻtdi.
Namoyishlarga qaramay Tanzaniya prezidenti Samia Hassan saylov gʻolibi deb eʼlon qilindi.
U deyarli 98 foiz ovoz oldi, natijada saylovni mutloq gʻolibiga aylandi.
Bir necha kunlik noroziliklardan soʻng Tanzaniyada prezident saylovi yakunlandi. Biroq saylov kuzatuvchilari va Yevropa parlamenti aʼzolari ovoz berish jarayonining shaffofligiga shubha bildirishdi. Shu bilan birga, mamlakat boʻylab zoʻravonlik bilan kechgan namoyishlar yuz berdi.
Tanzaniya Markaziy saylov komissiyasi shanba kuni mamlakat prezidenti Samia Suluhu Hassan 97,66 foiz ovoz bilan prezident saylovida gʻolib chiqqanini eʼlon qildi. U shu tariqa 29 oktabr kuni boʻlib oʻtgan saylovda barcha okruglarda ustunlikni qoʻlga kiritdi.
Saylov jarayoni bahsli boʻlib, Hassanning asosiy raqiblari saylovda ishtirok etishdan chetlashtirilgani sababli jarayon adolatliligi yuzasidan savollar paydo boʻlgan.
Asosiy muxolifat partiyasi "Chadema" saylovda ishtirok etishdan chetlashtirilgan edi. Partiya vakili Jon Kitoka Hassanning gʻalabasini “demokratik jarayon ustidan kulish” deb atadi va xalqaro nufuzli tashkilotni yangi saylovni nazorat ostida oʻtkazishga chaqirdi.
“Tanzaniya xavfsizligi masalasida bahs boʻlishi mumkin emas — mamlakat tinchligi va xavfsizligini taʼminlash uchun barcha imkoniyatlardan foydalanamiz,” dedi Hassan.
Saylov natijalari eʼlon qilingach, Tanzaniyaning yirik shaharlarida zoʻravon norozilik namoyishlari boshlandi. Namoyishchilar prezident Samia Suluhu Hassanning asosiy raqiblari saylovdan chetlashtirilganini va mamlakatda “keng koʻlamli bosim” mavjudligini tanqid qildilar.
Xavfsizlik choralariga qaramay, saylov kuni tartibsizliklar boʻlib oʻtdi. Guvohlarning aytishicha, ayrim namoyishchilar Hassanning bannerlarini yirtib tashlagan, hukumat binolariga oʻt qoʻygan, politsiya esa koʻzdan yosh oqizuvchi gaz va oʻq ishlatgan.
Internet kuzatuv tarmogʻi NetBlocks maʼlumotlariga koʻra, saylov kuni va undan keyin bir necha shaharlarida ijtimoiy tarmoqlarga hamda mobil internetga kirish cheklangan.