Uzoq kutilgan uchrashuv: Tramp va Si nimalarga kelishib oldi?

AQSh prezidenti Donald Tramp va Xitoy rahbari Si Szinpin savdo boj tariflari hamda nodir metallar boʻyicha kelishuvga erishdi.

Donald Tramp Si Szinpin bilan uzoq kutilgan uchrashuvini “katta muvaffaqiyat” deb atadi.

Ularning uchrashuvi natijasida tomonlar bojlarni kamaytirish va muhim nodir metallarning yetkazib berilishini taʼminlash boʻyicha kelishuvga erishdilar.

Tramp va Si bugun Xitoy va AQSh oʻrtasidagi savdo urushini yumshatish boʻyicha kelishuvga erishganini eʼlon qildilar. Bu kelishuv global bozorlarga ijobiy taʼsir koʻrsatadi: Vashington ayrim bojlarni kamaytiradi, Xitoy esa muhim nodir metallarni uzluksiz yetkazib berishni davom ettiradi.

Tramp soʻnggi olti yildagi birinchi uchrashuvini “ajoyib natija” deb atadi, Si esa ikki mamlakat oʻrtasidagi ziddiyatlarni hal qilish yoʻlida “muhim kelishuvga erishilganini” taʼkidladi.

“Bu ajoyib uchrashuv boʻldi”, — dedi Tramp Janubiy Koreyaning Busan shahrida boʻlib oʻtgan muzokaralardan soʻng. U Si Szinpinni “kuchli mamlakatning buyuk yetakchisi” deb atadi hamda aprel oyida Xitoyga tashrif buyurishini maʼlum qildi.

Trampning soʻzlariga koʻra, kelishuv doirasida Xitoy katta miqdorda soya dukkaklari va boshqa qishloq xoʻjaligi mahsulotlarini xarid qilishni darhol boshlaydi. Bu Tramp uchun muhim siyosiy masala boʻlib, Xitoy uchun ham muhim muzokara vositasi boʻldi.

Shuningdek, Trampning aytishicha, tomonlar Xitoyning muhim nodir metallari taʼminoti boʻyicha bir yillik, uzaytirilishi mumkin boʻlgan kelishuvga erishgan. Ushbu materiallar turli sanoat tarmoqlarida murakkab elektron komponentlar ishlab chiqarishda zarur hisoblanadi.

Yetakchilar uchrashuvdan soʻng darhol omma oldida izoh bermadi — muzokaralar taxminan bir soat qirq daqiqa davom etdi.

Tramp uchrashuv tugagach darhol Air Force One samolyotiga yoʻl oldi, u samolyotga chiqayotganda qoʻlini koʻtarib, mushtini silkitdi. Samolyot bir necha daqiqa oʻtib uchib ketdi. Si esa uchrashuvdan soʻng limuziniga minib ketgani kuzatilgan.