AQSh va Janubiy Koreya savdo bitimini imzoladi
Janubiy Koreya AQShga 350 milliard dollar sarmoya kiritishga rozi boʻldi, buning evaziga avtomobil eksportiga boj stavkalari pasaytiriladi.
Imzolangan kelishuvga koʻra, AQSh Janubiy Koreyadan import qilinadigan avtomobillarga boj stavkasini 25 foizdan 15 foizgacha kamaytiradi. Bu Janubiy Koreya avtomobil sanoati uchun yengillik yaratadi, chunki ilgari ular Yaponiyadagi raqobatchilariga nisbatan yuqoriroq boj toʻlovlariga duch kelishgan edi. Bitim AQSh prezidenti Donald Tramp va Janubiy Koreya prezidenti Li Ja Myung oʻrtasida tuzilgan.
Mazkur bitim iyul oyida tuzilgan dastlabki kelishuvdan keyin bir necha oylik muzokaralarga yakun yasadi.
Lining siyosiy maslahatchisi Kim Yong-Bomning aytishicha, kelishuv doirasida Janubiy Koreya AQShga 200 milliard dollar miqdorida naqd sarmoya kiritishga rozi boʻlgan. Har yili sarmoya hajmi 20 milliard dollardan oshmasligi belgilangan boʻlib, dastlabki sarmoya qoplangunga qadar foyda ikki davlat oʻrtasida taqsimlanadi.
Qolgan 150 milliard dollar esa ikki mamlakat oʻrtasidagi kema qurish boʻyicha hamkorlik loyihasi orqali taʼminlanadi.
Janubiy Koreyaning yuqori martabali rasmiylari avvalroq, mamlakat Yaponiya bilan AQSh oʻrtasidagi kelishuvni takrorlay olmasligini, chunki chet el valyuta zaxiralari kichikligi va AQSh bilan valyuta almashinuv bitimi yoʻqligini taʼkidlashgan edi.
Milliy assambleyada soʻzlagan Janubiy Koreya Markaziy banki rahbari Ri Chang-Yong AQShga har yili 15–20 milliard dollar miqdorida sarmoya kiritish von valyutasining qiymatiga neytral taʼsir koʻrsatishini bildirdi.
AQSh tomonidan avtomobil importiga boj stavkasining kamaytirilishi Janubiy Koreya avtomobil sanoatini Yaponiya bilan teng sharoitga olib chiqadi — yapon avtomobillariga hozir 15 foizlik boj qoʻllaniladi.
Maʼlumotlarga koʻra, oʻtgan yili Janubiy Koreyaning AQShga eksportining uchdan bir qismini avtomobillar tashkil etgan.