DXX Sirdaryoda advokatni qoʻlga oldi
U Tergov hibsxonasida saqlanayotgan fuqaroni IIB vaqtincha saqlash hibsxonasiga oʻtkazish hamda keyinchalik jinoyat ishini sudda ijobiy hal qilib berish evaziga pul talab qilgan.
Sirdaryoda advokat pora bilan ushlandi.
Sirdaryo tumanidagi advokatlik byurosi advokati oʻz xizmat mavqeidan foydalangan holda, tuman IIB huzuridagi Tergov boʻlimi ish yurituvida boʻlgan jinoyat ishi boʻyicha gumonlanuvchi tariqasida jalb qilinib, hozirda Xovos tumanidagi 8-son Tergov hibsxonasida saqlanayotgan fuqaroni Sirdaryo tuman IIB vaqtincha saqlash hibsxonasiga oʻtkazish hamda keyinchalik jinoyat ishini sudda uning foydasiga ijobiy hal qilib berish evaziga 5500 AQSh dollari talab qiladi.
Davlat xavfsizlik xizmati va Prokuratura organlari xodimlari tomonidan oʻtkazilgan tezkor tadbirda advokat 4500 AQSh dollari va 6 mln. soʻm olgan vaqtida ashyoviy dalillar bilan ushlandi.
Taʼkidlash lozimki, advokat jinoyat ishiga gumonlanuvchining huquqlarini himoya qilish maqsadida davlat hisobidan yuridik yordam koʻrsatish uchun jalb qilingan.
Hozirda unga nisbatan Jinoyat Kodeksining 168-moddasi 3-qismi “v” bandi va 28,211-moddasi 1-qismi bilan jinoyat ishi qoʻzgʻatilib, tergov harakatlari olib borilmoqda.
Avvalroq Toshkent shahri va Surxondaryoda advokatlar qoʻlga tushgandi.
Poytaxtda advokat fuqaroning ishini sud organlarida ishlovchi tanishlari orqali ijobiy hal etib, yengillik qilib berish evaziga 3700 AQSh dollari olgan.