Gʻallaorolda is gazi hodisasi: qurbonlar bor
Ayni paytda baxtsiz hodisaning kelib chiqish sabablarini tekshirish maqsadida komissiya tuzilgan.
25 oktabr kuni soat 06:50 larda Gʻallaorol tumani Sugʻunboy qishlogʻidagi uyda baxtsiz hodisa boʻlgan.
Hodisa oqibatida 2004 yilda tugʻilgan R.S.E. oʻgʻli (oʻgʻil) va 2006 yilda tugʻilgan R.Yu.S. qizi (kelin) is gazidan vafot etgan. Hodisa sabablarini tekshirish va tuman favqulodda vaziyatlar boʻlimining 2025 yil 27 oktabr kunidagi xatiga asosan ishchi guruh tuzilgan.
Ishchi guruh tarkibiga tuman hokimi oʻrinbosari v.v.b. S.Moʻminov, tuman FVB boshligʻi oʻrinbosari B.Joʻrayev, "Oʻzenergiya" inspeksiyasining Jizzax viloyati boshqarmasi bosh mutaxasissi B.Boltayev, “Gʻallaorol tumangaz” taʼminoti boʻlimi bosh muhandisi S.Zokirov va Tozaurugʻ QFY raisi A.Mamatov kiritilgan.
Ishchi guruhga mazkur baxtsiz hodisani 15 kun ichida oʻrganib chiqish va belgilangan tartibda dalolatnoma tuzish, dalolatnomalar nusxalarini tegishli tashkilotlarga yetkazish vazifasi topshirilgan.
Mazkur farmoyishning ijrosini nazorat qilish tuman hokimi oʻrinbosari v.v.b. S.Moʻminov zimmasiga yuklatilgan.