Markaziy bank asosiy stavkani yillik 14 foiz darajasida oʻzgarishsiz qoldirdi
2025 yil sentabr oyida umumiy inflyatsiya darajasi 0,8 foiz bandga pasayib, yillik 8 foizga teng boʻlgan.
MB asosiy stavkasi oʻzgarmadi.
Markaziy bank boshqaruvi asosiy stavkani yillik 14 foiz darajasida oʻzgarishsiz qoldirish toʻgʻrisida qaror qabul qildi.
2025 yil sentabr oyida umumiy inflyatsiya darajasi 0,8 foiz bandga pasayib, yillik 8 foizga teng boʻldi.
Bunda oziq-ovqat va nooziq-ovqat tovarlari guruhi inflyatsiyasi yillik 6,1 foizgacha sekinlashib, pasaytiruvchi hissa qoʻshdi. Xizmatlar inflyatsiyasi, jumladan, tartibga solinadigan narxlar taʼsirisiz ham, talab omillari hisobiga umumiy inflyatsiyadan yuqori darajada saqlanib qolmoqda, deyiladi Markaziy bank xabarida.
Qatʼiy pul-kredit sharoitlari hisobiga talab omillarining biroz maqbullashishi hamda almashuv kursi mustahkamlanishi taʼsirida bazaviy inflyatsiya pasayuvchi dinamikaga oʻtdi va sentabrda yillik 7 foizgacha sekinlashdi.
Jumladan, soʻmning mustahkamlanishi import inflyatsiyasining sekinlashishiga xizmat qilib, nooziq-ovqat tovarlari narxlarining maʼlum darajada barqarorlashuviga yordam bermoqda.
Soʻnggi oylarda isteʼmol savatida narxlari oʻsishi oʻtgan yilning mos davriga nisbatan sekinlashgan tovar va xizmatlarning ulushi oshib bormoqda hamda narxlar barqarorlashuvi keng qamrovli xususiyatga ega boʻla boshlaganini koʻrsatmoqda.
Sentabr oyida aholi va tadbirkorlarning inflyatsion kutilmalari pasayishda davom etdi, biroq ular joriy va prognoz inflyatsiya surʼatlaridan yuqori darajada saqlanib qolmoqda.
Yuqoridagilarni inobatga olib, joriy yil yakuniga inflyatsiya prognozi pasayish tomonga qayta koʻrib chiqildi va 8 foiz atrofida shakllanishi kutilmoqda.
Joriy yilning III choragidagi yuqori iqtisodiy oʻsish va investitsion faollik kelgusi chorakda ham davom etib, yil yakunida YaIM real oʻsishi 7-7,5 foiz atrofida boʻlishi prognoz qilinmoqda.
Aholi real daromadlari oshishi va chakana kreditlash faolligi xarid qobiliyatini qoʻllab-quvvatlamoqda va isteʼmol talabini oshirmoqda. Bu, oʻz navbatida, kelgusida iqtisodiyotda inflyatsion bosimlarni saqlanib qolishiga xizmat qilishi mumkin.
Sentabr oyida ham asosiy stavka yillik 14 foiz miqdorida oʻzgarishsiz qoldirilgandi.