Oʻzbekistonda “Formula-1” musobaqalari oʻtkazilishi mumkin
Mazkur sport Oʻzbekistonda avtosportni rivojlantirish va xalqaro imidjini mustahkamlashga yordam beradi. Hozirgacha musobaqalar 21 davlatda oʻtkazilgan.
Oʻzbekistonda “Formula-1” musobaqalari oʻtkazilishi mumkin.
Mazkur sport Oʻzbekistonda avtosportni rivojlantirish va xalqaro imidjini mustahkamlashga yordam beradi.
Oʻzbekiston “Formula-1” jahon chempionati bosqichini oʻtkazish uchun mumkin boʻlgan joy sifatida koʻrib chiqilmoqda. Bu esa Toshkentning avtosportni rivojlantirish va mamlakatning xalqaro imidjini mustahkamlashga boʻlgan intilishi bilan bogʻliq.
Sport tahlilchisi va jurnalist Jo Sovardning xabar berishicha, Oʻzbekiston “Formula-1” jahon chempionati bosqichini oʻtkazadigan yangi maydonchaga aylanishi mumkin.
Singapur Gran-prisi davomida Oʻzbekistonni ham oʻz ichiga olgan bir nechta Osiyo mamlakatlari vakillari oʻz yurtlarida “Formula-1” bosqichlarini tashkil etish imkoniyatlarini muhokama qilgan.
Mutaxassisning taʼkidlashicha, Toshkent avtosport boʻyicha mintaqaviy markazga aylanishga intilmoqda va xalqaro musobaqalarni mamlakatni modernizatsiya qilish hamda dunyo miqyosida targʻib qilish strategiyasining bir qismi sifatida koʻradi.
Mutaxassisning soʻzlariga koʻra, Tailand, Janubiy Koreya va Oʻzbekistonda “Formula-1” poygalari oʻtkazilishi haqida suhbatlar yurmoqda. Bu esa mazkur davlatlarda avtosportga qiziqish tobora ortib borayotganini koʻrsatadi.
Oʻzbekistonning ushbu muhokamalarda ishtirok etayotgani mamlakatning boshqa tashabbuslari bilan ham mustahkamlanmoqda. Xususan, dekabr oyida Toshkentda Xalqaro avtomobil federatsiyasi (FIA)ning Bosh assambleyasi boʻlib oʻtadi. Mazkur yirik tadbirni oʻtkazish xarajatlarini Oʻzbekiston tomoni oʻz zimmasiga olgan.
Maʼlumot oʻrnida, "Formula-1" musobaqasi 21 ta davlatda oʻtkaziladi va 24 ta bosqichdan iborat. Musobaqalar Xitoy, Qatar, Yaponiya va Ozarbayjon kabi mamlakatlarda ham oʻtkaziladi.