Surxondaryoda qurilish va uy-joy kommunal xoʻjaligi boʻlimi boshligʻi ushlandi
U sherigidan qurilishi tugallanmagan noturar bino loyiha hujjatlarini oʻtkazib berish evaziga pul olayotganda qoʻlga tushdi.
Surxondaryo viloyatida qurilish sohasida firibgarlik holati aniqlandi
Qurilish ishlarini loyihalashtirishga ixtisoslashgan MChJ arxitektori Muzrabot tumanida yashovchi fuqaroning ishonchiga kirgan holda, unga qarashli boʻlgan, qurilishi tugallanmagan noturar bino loyiha hujjatlarini tegishli tashkilotlardan “muammosiz” oʻtkazib berish evaziga firibgarlik yoʻli bilan 17 mln. soʻm talab qilgan.
DXX va ichki ishlar organlari hamkorligida oʻtkazilgan tezkor tadbirda u soʻralgan pul mablagʻini olgan vaqtida ashyoviy dalillar bilan ushlandi.
Shundan soʻng, tezkor tadbir davom ettirilib, arxitektor 17 mln soʻmdan 1 mln soʻmini Muzrabot tuman qurilish va uy-joy kommunal xoʻjaligi boʻlimi boshligʻiga berishi kerakligi maʼlum boʻlib, mazkur mansabdor ham ushbu pul mablagʻini olgan vaqtida ushlandi.
Hozirda ularga nisbatan jinoyat ishi qoʻzgʻatilib, tergov harakatlari olib borilmoqda.
Avvalroq Navoiyda Favqulodda vaziyatlar boʻlimi boshligʻi qoʻlga olingandi.
Shuningdek, Surxondaryoda tuman Majburiy ijro boʻlimi boshligʻining oʻrinbosari va davlat ijrochisi, Toshkentda esa advokatlar ushlangan.