Urugvay Lotin Amerikasida birinchi boʻlib evtanaziyaga ruxsat berdi
Evtanaziyaga eng katta qarshilik katolik cherkovi tomonidan bildirildi. Montevideo arxiyepiskopi Daniel Sturla qonunni "yomon va notoʻgʻri" deb atadi.
Urugvay 10 soatlik munozaradan soʻng evtanaziyani qonuniylashtirdi.
Urugvay evtanaziyani qonuniylashtirdi va shu tariqa Lotin Amerikasida yordam bilan oʻz joniga qasd qilishga ruxsat beruvchi qonunni qabul qilgan birinchi davlat boʻldi.
Evtanaziya — bu ogʻir va davosi yoʻq kasallikdan azob chekayotgan bemorning hayotini uning roziligi bilan tibbiy yoʻl bilan toʻxtatishdir.
Urugvay parlamenti ogʻir va davosi yoʻq kasallikdan aziyat chekayotgan bemorlarga evtanaziyani tanlash huquqini beruvchi qonun loyihasini maʼqulladi. Qonunga koʻra, ruhiy jihatdan sogʻlom, voyaga yetgan shaxs oʻz hayotini tibbiy yoʻl bilan yakunlash toʻgʻrisida yozma ravishda soʻrov yuborishi mumkin.
Hujjat, davolab boʻlmaydigan kasallikning oxirgi bosqichida boʻlgan fuqarolarga bu jarayonni malakali tibbiy mutaxassislar tomonidan, ogʻriqsiz va hurmatli tarzda amalga oshirish imkonini beradi.
Urugvay ijtimoiy jihatdan liberal siyosati bilan ajralib turadi. Mamlakat ilgari marixuana, bir jinsli nikoh va abortni ham qonuniylashtirgan edi.
Qonun boʻyicha 10 soat davom etgan muhokamalarda deputatlar oʻzaro hurmat bilan munozara olib borgan boʻlsa-da, ovoz berishdan soʻng ayrim norozilar parlament binosi tashqarisida “qotillar!” deya norozilik bildirishdi.
Liberal senator Patritsiya Kramer Montevideoda chiqish qilib, “jamoatchilik fikri bizdan bu masalani koʻtarishimizni soʻramoqda,” dedi.
Soʻrovnoma natijalariga koʻra, urugvayliklarning 62 foizi evtanaziyaning qonuniylashtirilishini qoʻllab-quvvatlaydi (manba: Sifra konsultatsion firmasi).
Evtanaziyaga eng katta qarshilik katolik cherkovi tomonidan bildirildi. Montevideo arxiyepiskopi Daniel Sturla Catholic News Agencyʼga bergan intervyusida shunday dedi:
“Bu qonun hayotni qadrlashga emas, balki ayrim hayotlarni befoyda deb hisoblashga xizmat qiladi. Biz uni tubdan yomon, notoʻgʻri deb bilamiz.”
Qonun qabul qilinganidan soʻng, 20 yildan beri ALS kasalligidan aziyat chekayotgan 71 yoshli Beatris Gelos bu tashabbusni “rahmli va insonparvar qaror” deb atadi.
“Boshqalar bu holatda yashash qandayligini tasavvur ham qila olmaydi,” — dedi u.
Urugvay shu tariqa Lotin Amerikasida evtanaziyani qonun bilan ruxsat bergan birinchi davlat boʻldi. Kolumbiya va Ekvadorda esa bu amaliyot Oliy sud qarorlari orqali dekriminalizatsiya qilingan.