Samarqandda 21 ming dollarga kumush sotayotganlar qoʻlga olindi
Tegishli baholash xulosasiga koʻra, ushbu kumush metallning narxi 502 mln soʻmdan oshishi aniqlandi.
DXX kumushning noqonuniy savdosiga chek qoʻydi.
Davlat xavfsizlik xizmatining Samarqand viloyati boʻyicha boshqarmasi xodimlari tomonidan Narpay tumanida tezkor tadbir oʻtkazilgan.
Unda Navoiy viloyatida yashovchi, 1980, 1983 va 1987 yillarda tugʻilgan 3 nafar shaxs “shartli xaridor”ga 18 kg kumush qimmatbaho metall qotishmasini har bir gramini 11.700 soʻmdan hisoblab, jami 21 ming AQSh dollariga sotgan vaqtlarida jinoyat ustida ushlandi.
Iqtisodiyot va moliya vazirligi huzuridagi Davlat asillik darajasi nazorati inspeksiyasining tegishli xulosasiga koʻra, ashyoviy dalil sifatida olingan mazkur metallning sof ogʻirligi 16 kg 744 gr boʻlib, asillik darajasi “999”ni tashkil etadi.
Shuningdek, tegishli baholash xulosasiga koʻra, ushbu kumush metallning narxi 502 mln 344 ming soʻmni tashkil etadi.
Hozirda mazkur shaxslarga nisbatan Jinoyat Kodeksining 177-moddasi 4-qismi “a” bandi bilan jinoyat ishi qoʻzgʻatilib, ushbu qimmatbaho metallning kelib chiqish manbasini aniqlash boʻyicha chora-tadbirlar amalga oshirilmoqda.