Mahalla “yettiligi” faoliyatini kompleks baholaydigan tizim ishga tushiriladi
Hokimlar yaxshi ishlagan 10 ta “yettilik”ning barchasini mukofotlash, qoʻshimcha ustamalar berishni yoʻlga qoʻyadi.
Prezident mahallalardagi “yettilik” ish vaqtining yarmini turli majlis va tadbirlarda oʻtkazayotganini koʻrsatib oʻtdi.
Yoki “yettilik” xodimlarining aniq vazifalari va KPI belgilangani bilan mahalladagi umumiy natijadorlikni baholaydigan tizim yoʻq.
Hozirda “yettilik” aʼzolarining 1 ming 700 nafari mahalla hududidan 20-30 kilometr uzoqdan qatnaydi. Oqibatda oʻtgan yili 68 nafar “yettilik” vakillari biriktirilgan mahallasiga bir necha oy kelmagan.
Mutasaddilarga “yettilik” faoliyatini kompleks baholaydigan tizimni ishga tushirish topshirildi.
Tuman hokimlari yil yakuniga koʻra, yaxshi ishlagan 10 ta “yettilik”ning barchasini mukofotlash, ularga qoʻshimcha ustamalar berishni yoʻlga qoʻyadi.
“Shunda “yettilik” hamjihat va yagona jamoa boʻlib ishlaydi”, – dedi Prezident.
Bundan buyon “yettilik” xodimlari bilan har bir yoʻnalish boʻyicha alohida yigʻilish oʻtkazish taqiqlanishi belgilandi.
Avvalroq eng yaxshi soliq toʻlovchi mahallalar reytingi joriy etilishi aytilgandi.
Bunda 100 talikka kirgan mahallaga “Tashabbusli byudjet”ning yangi tizimi boʻyicha infratuzilma xarajatining 75 foizi byudjetdan toʻlab beriladi. Ushbu mahallalarning har biriga qoʻshimcha 2 milliard soʻmdan ajratiladi.