Chirchiqda hokim yordamchilari bandlik boʻyicha qoʻshib yozgani maʼlum boʻldi
Ular shahardagi tadbirkorlik subʼektlariga fuqarolarning bandligini taʼminlash boʻyicha yoʻllanmalar yuborib, tadbirkorlik subʼektlarining elektron kalitidan gʻayriqonuniy ravishda foydalangan.
Chirchiq shahridagi hokim yordamchilari aholi bandligini taʼminlashda gʻayriqonuniy yoʻllardan foydalangani maʼlum boʻldi. Ularga shahar hokimi intizomiy jazo bergan.
Xususan, Ishonch, Adolat, Chinor, Gʻalaba, Madaniyat, Sharq, Bahor mahallalaridagi hokim yordamchilariga hayfsan jazosi qoʻllanilgan.
Ular 2025 yil 17 yanvardagi PQ-12-sonli qaror va sohaga oid boshqa normativ-huquqiy hujjatlar ijrosini taʼminlash yuklatilgan boʻlsa-da, xizmat vazifalarini lozim darajada bajarmasdan, ijro intizomini buzgani aytilgan.
Shuningdek, aholi bandligi ish rejasi bajarilishida hisobotlarni sunʼiy ravishda koʻtarish maqsadida shaharda faoliyat olib borayotgan tadbirkorlik subʼektlariga fuqarolarning bandligini taʼminlash boʻyicha yoʻllanmalar yuborib, tadbirkorlik subʼektlarining elektron kalitidan gʻayriqonuniy ravishda foydalangan.
Shu orqali oʻzi tomonidan yoʻllanma asosida yuborilgan fuqarolarni tadbirkorning nomidan ishga qabul qilib, hisobot davri tugagach, ularni ishdan boʻshatib yuborgan.
Huquqni muhofaza qiluvchi organlar hozircha ularga nisbatan ish qoʻzgʻagani haqida maʼlumot yoʻq.