Isroil falastinlik asirlarni ozod etishga kirishdi
HAMAS esa urushda asir olingan barcha isroilliklarni qaytardi. Ayni damda AQSh rahbari Donald Tramp Isroilda boʻlib turibdi.
Falastinlik asirlar bosqichma-bosqich ozod etila boshlandi.
AQSh prezidenti Donald Tramp Isroil parlamenti bilan olib borgan muzokaralar natijasida falastinlik asirlar bosqichma-bosqich ozod qilinishi boshlanyapti.
Eng soʻnggi maʼlumotlarga qaraganda, Gʻazoda qolgan barcha garovdagilar HAMAS asirligidan ozod qilindi va ikki yillik urushdan soʻng Isroilga qaytarildi. Isroil harbiylari tomonidan 13 kishilik garovdagilar guruhi endigina chegaradan olib oʻtildi, undan oldin esa 7 kishilik boshqa bir guruh ozod qilingan edi.
AQSh ilgari surgan oʻt ochishni toʻxtatish toʻgʻrisidagi kelishuvning birinchi bosqichining bir qismi sifatida, umrbod qamoq jazosini oʻtayotgan 250 nafar falastinlik mahbus ham ozod qilindi.
Shuningdek, Gʻazoda yuzlab odamlar 2023 yil 7 oktabrdan beri Isroilda saqlanayotgan 1 718 nafar falastinlik mahbusning ozod qilinishini kutmoqda.
Eslatib oʻtamiz, Qoʻshma Shtatlar prezidenti 9 oktabr sanasida HAMAS va Isroil tomonidan maʼqullangan sulhni tuzishga erishgandi. Tramp xabarida sulhning birinchi bosqichida garovlarni ozod qilishni ikkala hukumatga ham yuklagandi.
Tramp hozirda Isroil parlamentiga yetib keldi va u yerda Isroil Bosh vaziri Binyamin Netanyaxu bilan uchrashdi. Keyinroq u Knesset aʼzolariga murojaat qiladi hamda ayrim garovga olinganlarning oila aʼzolari bilan ham uchrashadi.
Shundan soʻng Tramp Misrga yoʻl oladi va u yerda 20 dan ortiq davlat rahbarlari Gʻazoning kelajagiga bagʻishlangan sammitda ishtirok etishi rejalashtirilgan.
Avvalroq Gʻazo sektorida asirlarni almashish boshlangani xabar berilgandi.