DXX Samarqandda Agroinspeksiya xodimini qoʻlga oldi
U yerning unumdorligiga zarar yetkazgan fuqarodan 3 ming dollar talab qilgan.
Samarqandda Agroinspeksiya xodimi qamoqqa olindi.
Vazirlar Mahkamasi huzuridagi Agrosanoat majmui ustidan nazorat qilish inspeksiyasi Samarqand viloyati boshqarmasining yetakchi mutaxassisi Samarqand tumanidagi qishloq xoʻjaligi mahsulotlari yetishtirishga ixtisoslashgan fermer xoʻjalikda oʻtkazilgan oʻrganish jarayonida xoʻjalikning 50 sotix yer maydonini ijaraga olib foydalanayotgan fuqaro tomonidan yerning unumdorligiga zarar yetkazilganligi aniqlanib, unga nisbatan chora koʻrmaslik evaziga 3 ming AQSh dollari talab qilgan. Soʻngra muqaddam 500 AQSh dollari oladi.
Davlat xavfsizlik xizmati hamda viloyat prokuraturasi xodimlari hamkorligida oʻtkazilgan tezkor tadbirda yetakchi mutaxassis qolgan 2500 AQSh dollarini olgan vaqtida ashyoviy dalillar bilan ushlandi.
Unga nisbatan Jinoyat Kodeksining 168-moddasi 3-qismi “v” bandi va 28,211-moddasi 1-qismi bilan jinoyat ishi qoʻzgʻatilib, “qamoqqa olish” tarzidagi ehtiyot chorasi qoʻllanildi.
Hozirda tergov harakatlari olib borilmoqda.