Jizzaxda 37 nafar bogʻcha tarbiyalanuvchisi zaharlandi
Ular biokefir, pishloq va sariyogʻ kabi mahsulotlar isteʼmol qilishganligi aniqlangan.
Jizzaxning Forish tumanida oʻnlab bolalar zaharlandi. Bu haqda tuman hokimligi xabar berdi.
2025 yil 9 oktabr kuni soat 9-00 lardan 16-00 ga qadar boʻlgan vaqt davomida Forish tumani maktabgacha va maktab taʼlimi boʻlimiga qarashli 1, 3, 5 va 7-sonli davlat maktabgacha taʼlim muassasalarining 3 yoshdan 7 yoshgacha boʻlgan 37 nafar tarbiyalanuvchilari isitma koʻtarilishi, koʻngil aynishi, qorin ogʻrigʻi, ich ketish va holsizlik kabi shikoyatlar bilan tuman tibbiyot birlashmasiga murojaat qilishgan.
Shifokorlar tomonidan oʻtkazilgan epidemiologik surishtiruv davomida murojaat qilib kelgan bolalar 2025 yil 8 oktabr kuni maktabgacha taʼlim muassasalarida biokefir, pishloq va sariyogʻ kabi mahsulotlar isteʼmol qilishganligi aniqlanib, ularga anamnez va birinchi tekshiruvlar asosida “oʻtkir diareya” tashxisi qoʻyilib, statsionar ravishda tibbiy yordam koʻrsatilgan.
Aniqlanishicha, Jizzax viloyati sanitariya epidemiologik osoyishtalik va jamoat salomatligi boshqarmasining dastlabki xulosasiga asosan Forish tumani maktabgacha va maktab taʼlimi boʻlimiga qarashli 1, 3, 5 va 7-sonli davlat maktabgacha taʼlim tashkilotlarida ommaviy zaharlanish yuzaga kelishida oziq-ovqat mahsulotlarini tashish, saqlash, ishlov berish jarayonlaridagi sanitariya qoida va normalarining buzilishi holatlari mavjudligi sababli inson organizmida oshqozon ichak hazm qilish tizimining buzilishiga olib kelishi mumkinligi aniqlangan.
Mazkur holat yuzasidan Forish tuman prokuraturasi tomonidan Jinoyat kodeksining 205-moddasi 1-qismi bilan jinoyat ishi qoʻzgʻatilib, surishtiruv ishlari olib borilmoqda.
Eslatib oʻtamiz, avval Toshkent viloyatida ham qariyb 2 ming nafar bola kefirdan zaharlangandi.
