Iqtisodiy jinoyatlarga qarshi kurashish departamentining ikki mansabdori qamoqqa olindi
Ular Zangiota tuman sudida koʻrilayotgan jinoyat ishini hal qilib berish evaziga pul olayotgan boʻlgan.
Prokuratura organlari xodimlarining nokonuniy harakatlariga chek qoʻyildi.
Davlat tuzilmalarida korrupsion holatlarga chek qoʻyish maqsadida Davlat xavfsizlik xizmati organlari tomonidan kompleks chora-tadbirlar amalga oshirilmoqda.
Jumladan, Toshkent viloyatining Bekobod shahrida tezkor tadbir oʻtkaziildi. Bosh prokuratura huzuridagi Iqtisodiy jinoyatlarga qarshi kurashish departamentining Guliston tuman boʻlimi boshligʻi hamda Bekobod shahar boʻlimi katta tezkor vakili fuqarodan 25 ming AQSh dollari olgan vaqtlarida ashyoviy dalillar bilan ushlandi.
Maʼlum boʻlishicha, ular Zangiota tumanida faoliyat yurituvchi 4 ta MChJning norasmiy rahbari va boshqalarga nisbatan Jinoyat Kodeksining 184-moddasi 3-qismi bilan qoʻzgʻatilib, hozirda jinoyat ishlari boʻyicha Zangiota tuman sudida koʻrilayotgan jinoyat ishini ularning foydasiga ijobiy hal qilishni hamda Sirdaryo viloyati Soliq boshqarmasi tomonidan 2 ta MChJda oʻtkazilgan kameral soliq tekshiruvlarini noqonuniy deb topib berishni vaʼda qilishgan.
Tergovga qadar tekshiruv davomida aniqlanishicha, IJQKD xodimlari jinoyat ishi doirasida soliq tekshiruvi oʻtkazish orqali aniqlangan zarar miqdorini kamaytirish evaziga MChJlarning norasmiy rahbaridan muqaddam 108 ming AQSh dollari ham olishgan.
Hozirda ularga nisbatan Jinoyat Kodeksining 168-moddasi 4-qismi “a” bandi va 28,211-moddasi 3-qismi “a” bandi bilan jinoyat ishi qoʻzgʻatilib, “qamoq” ehtiyot chorasi qoʻllanildi. Tergov harakatlari olib borilmoqda.